തിരുവനന്തപുരം . KMRLന് 51 ഏക്കര്‍ ഭൂമി പതിച്ചുനൽകണമെന്ന ജില്ലാ സമിതി ശുപാർശ സർക്കാർ റദ്ദാക്കണമെന്ന് മാത്യു കുഴൽനാടൻ. ജില്ലാ സമിതി ശുപാർശ റവന്യു വകുപ്പ് തള്ളിയത് ഹൈക്കോടതി റദ്ദാക്കിയിരിക്കെ കോടതിയെ ചാരി രക്ഷപ്പെടാനാണ് സർക്കാർ ശ്രമമെന്നും മാത്യു കുഴൽനാടൻ എം എൽ എ ആരോപിച്ചു.
2023 ഓഗസ്റ്റിലാണ് ഈ ഉത്തരവ് ഉണ്ടായത്. ജില്ലാ സമിതി ശുപാർശ റദ്ദാക്കിയില്ലെങ്കിൽ കോടതിയെ ചാരി സർക്കാരിന് രക്ഷപ്പെടാം. ഭൂമി പതിച്ചുനൽകണമെന്ന ജില്ലാ സമിതി ശുപാർശ നിയമവിരുദ്ധമാണ്. കുറ്റക്കാർക്കെതിരെ നടപടിയെടുക്കണം. ഇക്കാര്യം റവന്യു മന്ത്രിയോട് ആവശ്യപ്പെട്ടിരുന്നു. ജില്ലാസമിതി ശുപാർശ കെഎംആർഎല്ലിന് അനുകൂലമായി നിൽക്കുകയാണ്. അങ്ങനെ നിന്നാൽ കോടതിയിൽ വീണ്ടും കമ്പനിക്ക് അനുകൂലമായ വിധി ഉണ്ടാവും. റവന്യു വകുപ്പിന്റെ ഉത്തരവ് വീണ്ടും കോടതി തള്ളും – മാത്യു കുഴൽനാടൻ പറഞ്ഞു.
ചങ്ങാത്ത മുതലാളിത്തം എന്തെന്ന് പാർട്ടി ക്ലാസിൽ പറയുമ്പോൾ ഈ ഉദാഹരണം പറയണമെന്ന് മന്ത്രി പി. രാജീവിനെ മാത്യു കുഴൽനാടൻ പരിഹസിച്ചു. കമ്യൂണിസ്റ്റ്‌ പാർട്ടിയുടെ നയങ്ങളും പരിപാടികളും മുറുകെപ്പിടിക്കുന്നവർ ഇതേ പറ്റി അന്വേഷിക്കണമെന്നും മാത്യു കുഴൽനാടൻ പറഞ്ഞു.
