കുടക് . മൂന്നംഗ മലയാളി കുടുംബത്തെ കർണാടകയിലെ കുടകിലുളള റിസോർട്ടിൽ മരിച്ച നിലയിൽ കണ്ടെത്തി. കൊല്ലം സ്വദേശികളായ വിനോദ് ബാബുസേനൻ (43), ഭാര്യ ജിബി അബ്രഹാം (37) മകൾ ജെയ്ൻ മരിയ ജേക്കബ് (11) എന്നിവരാണ് മരണപ്പെട്ടത്. ഞായറാഴ്ച ഉച്ചയോടെയാണ് റിസോർട്ട് ജീവനക്കാർ കുടുംബത്തെ മരിച്ച നിലയിൽ കണ്ടെത്തുന്നത്.
വിനോദിനെയും ജിബിയെയും മുറിക്കുളളിൽ തൂങ്ങിനിൽക്കുന്ന നിലയിലും മകൾ ജെയിനെ കിടക്കയിൽ മരിച്ചനിലയിലുമാണ് ജീവനക്കാർ കണ്ടെത്തിയത്. കുട്ടിയെ കൊലപ്പെടുത്തിയതിന് ശേഷം ദമ്പതികൾ തൂങ്ങിമരിച്ചുവെന്നാണ് പൊലീസ് സംശയിക്കുന്നത്. സാമ്പത്തിക ബാദ്ധ്യതയാകാം മരണകാരണമെന്നാണ് പൊലീസിന്റെ പ്രാഥമിക നിഗമനം.
മരണത്തിൽ മറ്റാരും ഉത്തരവാദികളല്ലെന്ന് ദമ്പതികൾ എഴുതി ഒപ്പിട്ട ആത്മഹത്യാക്കുറിപ്പ് പൊലീസ് കണ്ടെടുത്തു. മൃതദേഹങ്ങൾ കുടകിലെ സർക്കാർ ആശുപത്രിയിലേക്ക് മാറ്റി. മരിച്ചവരുടെ ബന്ധുക്കളെ വിവരം അറിയിച്ചിട്ടുണ്ടെന്നും പോസ്റ്റ്മോർട്ടത്തിന് ശേഷം മൃതദേഹങ്ങൾ ബന്ധുക്കൾക്ക് വിട്ടുനൽകുമെന്നും പൊലീസ് പറഞ്ഞു.
