തിരുവനന്തപുരം . രാജ്യത്തെ ഛിന്നഭിന്നമാക്കുന്ന ഗ്യാങ്ങാണ് കോൺഗ്രസെന്ന് ബിജെപി അധ്യക്ഷൻ കെ. സുരേന്ദ്രൻ. ഇന്ത്യ നശിക്കണമെന്നാണ് കോണ്‍ഗ്രസ് ആഗ്രഹിക്കുന്നത്. രാജ്യത്തെ ഛിന്നഭിന്നമാക്കാനാണ് രാഹുൽ ഗാന്ധിയും അനുയായികളും ശ്രമിക്കുന്നത്. പുൽവാമ ഭീകരാക്രമണത്തെ കുറിച്ച് പത്തനംതിട്ട എംപി ആന്റോ ആന്റണിയുടെ പരാമർശത്തെ വിമർശിച്ച സുരേന്ദ്രൻ, ആന്റോ ആന്റണിയുടേത് ഒറ്റപ്പെട്ട ശബ്ദമല്ലെന്നും രാജ്യത്തെ ഛിന്നഭിന്നമാക്കുന്ന ഗ്യാങ്ങാണ് കോൺഗ്രസെന്നും പറഞ്ഞു.
‘രാജ്യത്തെ ഛിന്നഭിന്നമാക്കുന്ന ഗ്യാങ്ങാണ് കോൺഗ്രസ്. രാഹുൽ ഗാന്ധിയും അനുയായികളും അതിന്റെ ഭാഗമാണ്. വിദേശ രാജ്യങ്ങളിൽ പോയി ഇന്ത്യക്കെതിരെ പ്രചാരണം നടത്തുകയാണ് കോൺഗ്രസിന്റെ നേതാക്കന്മാർ. ഇന്ത്യ നശിക്കണം എന്നാണ് കോൺഗ്രസ് ആഗ്രഹിക്കുന്നത്. കമ്യൂണിസ്റ്റുകാർ പണ്ടേ അങ്ങനെയാണ്. ഇന്ത്യക്കൊരു ദേശീയതയില്ലെന്നാണ് കമ്യൂണിസ്റ്റുകാർ പറയുന്നത്. പക്ഷേ, കോൺഗ്രസ് ഇങ്ങനെ പറയാമോ?’– സുരേന്ദ്രൻ ചോദിച്ചു.
‘കോൺഗ്രസിലും ഇടതുപക്ഷത്തിലും ജനങ്ങൾക്കുള്ള പ്രതീക്ഷ നഷ്ടമായി. കേരളത്തിലടക്കം കോൺഗ്രസ് തകർച്ചയുടെ വക്കിലാണ്. ദേശീയതലത്തിൽ കോൺഗ്രസ് ഇല്ലാതായി. അതുകൊണ്ടാണ് ഇത്തവണയും വയനാട്ടിൽ തന്നെ മത്സരിക്കാൻ രാഹുൽ ഗാന്ധി തീരുമാനിച്ചത്. 2024ലെ തിരഞ്ഞെടുപ്പോടെ കേരളത്തിലും കോൺഗ്രസ് തകർന്ന് തരിപ്പണമാകും.’– സുരേന്ദ്രൻ പറഞ്ഞു.
