കോൺഗ്രസ് നേതാവ് രാഹുൽ ഗാന്ധി ലോക്സഭാ തെരഞ്ഞെടുപ്പില്‍ വയനാട്ടിൽ നിന്ന് മത്സരിക്കില്ലെന്ന് റിപ്പോർട്ടുകൾ. മറ്റ് സംസ്ഥാനങ്ങളിൽ നിന്ന് രണ്ട് ലോക്സഭാ സീറ്റുകളിൽ രാഹുൽ ഇത്തവണ മത്സരിക്കുമെന്നാണ് പുറത്ത് വരുന്ന റിപ്പോർട്ടുകൾ. കര്‍ണാടകത്തിലേയോ തെലങ്കാനയിലോ ഒരു സീറ്റിൽ നിന്നും ഉത്തർ പ്രദേശിലെ ഒരു സീറ്റിൽ നിന്നും രാഹുൽ ജനവിധി തേടും.
ഇത്തവണ ആനി രാജയെയാണ് വയനാട്ടിൽ സിപിഐ സ്ഥാനാർത്ഥിയാക്കുന്നത്. പാർട്ടി ജനറൽ സെക്രട്ടറി ഡി രാജയുടെ ഭാര്യ കൂടിയാണ് ആനിരാജ. മുന്നണിയിലെ പ്രധാന നേതാക്കൾ പരസ്പരം മത്സരിക്കുന്നത് ഇന്ത്യാ മുന്നണിയുടെ ഐക്യത്തിന് നല്ലതായിരിക്കില്ലെന്ന വിലയിരുത്തലും രാഹുലിന്റെ തീരുമാനത്തിന് പിന്നിലുണ്ടെന്നാണ് പറയുന്നത്.
ഇന്ത്യൻ യൂണിയൻ മുസ്ലീം ലീഗ് ഇത്തവണ 2 സീറ്റിന് പകരം 3 സീറ്റുകൾ നൽകണമെന്ന് കോൺഗ്രസിൽ സമ്മർദ്ദം ചെലുത്തി വരവെയാണ് രാഹുൽ കേരളത്തിൽ മത്സരിക്കില്ലെന്ന് വാർത്തകൾ പുറത്ത് വന്നിരിക്കുന്നത്. വയനാട്ടിലെ വോട്ടർമാരിൽ ഭൂരിപക്ഷവും മുസ്ലിം സമുദായത്തിൽ നിന്നുള്ളവരാണ്. വയനാട് സീറ്റിൽ മുസ്ലിം ലീഗ് പിടി മുറുക്കുകയുമാണ്. എൽഡിഎഫിലെ ധാരണ പ്രകാരമാണ് സിപിഐ വയനാട് ഉൾപ്പടെ നാല് സീറ്റുകളിൽ മത്സരിക്കുന്നത്. 2019ലെ ലോക്സഭാ തെരഞ്ഞെടുപ്പിൽ നാലുലക്ഷത്തിലധികം വോട്ടിന്റെ ഭൂരിപക്ഷത്തിലാണ് സിപിഐ സ്ഥാനാർത്ഥി പി പി സുനീറിനെ രാഹുൽ ഗാന്ധി പരാജയപ്പെടുത്തുന്നത്.
