ലോക്സഭ തെരഞ്ഞെടുപ്പില്‍ എറണാകുളം മണ്ഡലത്തിലെ ട്വന്റി 20 സ്ഥാനാര്‍ഥിയായി അഡ്വ. ആന്റണി ജൂഡിയെ പ്രഖ്യാപിച്ചു. കിഴക്കമ്പലത്ത് നടന്ന മഹാസംഗമത്തില്‍ പ്രസിഡന്‍റ് സാബു എം ജേക്കബാണ് സ്ഥാനാര്‍ഥിയെ പ്രഖ്യാപിച്ചത്. എറണാകുളം തേവര സ്വദേശിയായ ആന്റണി ജൂഡി അഭിഭാഷകൻ, യുവജനപ്രവർത്തകൻ, സംരംഭകൻ എന്നി നിലകളില്‍ പ്രവര്‍ത്തിക്കുകയാണ്.
ഐസിവൈഎം ദേശീയ പ്രസിഡണ്ട് (2022 – 24), ഐസിവൈഎം ദേശീയ ജനറൽ സെക്രട്ടറി (2020 – 22), 2023 ഡിസംബറിൽ ദുബായിൽ നടന്ന ഐക്യരാഷ്ട്രസഭയുടെ COP28 കാലാവസ്ഥാവ്യതിയാന ഉച്ചകോടിയിലെ നിരീക്ഷകൻ, 2023 ൽ പോർട്ടുഗലിൽ നടന്ന ലോക യുവജന സമ്മേളനത്തിൽ ഇന്ത്യയുടെ പതാകാവാഹകൻ എന്നീ നിലകളിൽ ഈ 28കാരന്‍ ശ്രദ്ധ നേടിയിട്ടുണ്ട്.
ചാലക്കുടി മണ്ഡലത്തിൽ അഡ്വ. ചാര്‍ളി പോൾ ആണ് ട്വന്റി 20 സ്ഥാനാര്‍ഥി. മലയാറ്റൂര്‍ – നീലീശ്വരം സ്വദേശിയായ പോൾ ഹൈക്കോടതിയിൽ അഭിഭാഷകനാണ്. കാലടി ശ്രീശങ്കരാ കോളേജ് യൂണിയൻ ചെയർമാൻ (1984) മദ്യവിരുദ്ധസമിതി സംസ്ഥാന വക്താവ് (2021) എറണാകുളം – അങ്കമാലി അതിരൂപത പാസ്റ്ററൽ കൗൺസിൽ ജനറൽ സെക്രട്ടറി (2004, 2006) പ്രവര്‍ത്തിച്ചിട്ടുണ്ട്. 35 വർഷത്തിനുള്ളിൽ 10-ലക്ഷത്തോളം ആളുകളെ വിവിധമേഖലകളിൽ പരിശീലിപ്പിച്ചിട്ടുണ്ട്. പത്തിലേറെ പുസ്തകങ്ങൾ എഴുതിയിട്ടുണ്ട്.
