ചെന്നൈ . അന്യജാതിക്കാരനെ പ്രണയിച്ചതിന് സഹോദരിയെയും കാമുകനെയും യുവാവ് വെട്ടിക്കൊലപ്പെടുത്തി. തുടർന്ന് യുവാവിന്റെ തലവെട്ടി പൊതുസ്ഥലത്ത് പ്രദർശിപ്പിച്ചു. തമിഴ്‌നാട്ടിലെ മധുരയില്‍ മഹാലക്ഷ്മി, സതീഷ് എന്നിവരാണ് കൊല്ലപ്പെട്ടത്. സതീഷിന്റെ തല വെട്ടിയെടുത്ത് പൊതുസ്ഥലത്ത് പ്രദര്‍ശിപ്പിക്കുകയായിരുന്നു. പ്രതികളെ പിടികൂടാന്‍ രണ്ടു പ്രത്യേക സംഘങ്ങള്‍ രൂപീകരിച്ച് പോലീസ് അന്വേഷണം നടത്തി വരുകയാണ്.
മധുര തിരുമംഗലത്താണ് നാടിനെയാകെ നടുക്കിയ അരുംകൊല നടന്നിരിക്കുന്നത്. 20 വയസുള്ള പ്രവീണ്‍ കുമാര്‍ ആണ് സഹോദരിയെയും കാമുകനെയും കൊലപ്പെടുത്തിയിരിക്കുന്നത്. മഹാലക്ഷ്മി അന്യജാതിയില്‍പ്പെട്ട സതീഷുമായി പ്രണയത്തിലാ യിരുന്നു. ഇതിനെ എതിര്‍ത്ത കുടുംബം മഹാലക്ഷ്മിയെ മറ്റൊരാളുമായി വിവാഹം കഴിപ്പിച്ചു. ഈ ബന്ധം പിരിഞ്ഞ ശേഷം മഹാലക്ഷ്മി അടുത്തിടെയാണ് വീട്ടില്‍ മടങ്ങിയെത്തുന്നത്. പിന്നീട് മഹാലക്ഷ്മി സതീഷുമായി അടുപ്പത്തിലാവുകയായിരുന്നു.
ഈ ബന്ധത്തെ ചൊല്ലി വീട്ടില്‍ പ്രശ്‌നങ്ങള്‍ പതിവായിരുന്നു. ഇതിന് പിറകെയാണ് ഇപ്പോൾ കൊലപാതകം നടന്നിരിക്കുന്നത്. സതീഷിന്റെ കണ്ണില്‍ മുളകുപൊടി വിതറിയ ശേഷം വെട്ടിക്കൊലപ്പെടുത്തുകയായിരുന്നു.. തുടര്‍ന്ന് വീട്ടിലെത്തിയ പ്രവീണ്‍ കുമാര്‍ സഹോദരിയെയും വെട്ടി പരിക്കേൽപ്പിച്ചു. ഇത് തടയാന്‍ ശ്രമിച്ച അമ്മയ്ക്കും പരിക്കേറ്റു. അമ്മ ആശുപത്രിയില്‍ ചികിത്സയിലാണ്.
