സുൽത്താൻബത്തേരി . സുൽത്താൻബത്തേരിയിൽ കാട്ടാനയിറങ്ങി വീടിന്റെ ഗേറ്റും മതിലും തകർത്ത് വീട്ടിൽ കയറി ഒരാളെ ചവിട്ടി കൊന്നു. ശനിയാഴ്ച രാവിലെ അതിർത്തിയിലെ വനത്തിൽ നിന്നെത്തിയ റേഡിയോ കോളർ ഘടിപ്പിച്ച ആനയാണ് ആക്രമണം നടത്തിയത്. പടമലയിലെ ജനവാസ മേഖലയിലാണ് സംഭവം.
പടമല സ്വദേശി അജിയാണ് മരണപ്പെട്ടത്. കർണാടകയിൽ നിന്നുള്ള റേഡിയോ കോളർ ഘടിപ്പിച്ച ആനയാണ് വയനാട്ടിലിറങ്ങിയത്. പുലർച്ചെയോടെ ആന ജനവാസ മേഖലയിൽ ഇറങ്ങിയതായി റേഡിയോ കോളറിൽ നിന്നും വ്യക്തമായിരുന്നു. തുടർന്ന് വനം വകുപ്പ് കാട്ടാനയെ ഇവിടെ നിന്നും തുരത്തി ചാലിഗദ്ദ എന്ന സ്ഥലത്തെത്തിക്കുകയാണ് ഉണ്ടായത്.
കൃഷിയിടത്തിലേക്ക് ജോലിക്കാരെ വിളിക്കുന്നതിനായി പോയ അജിയെ ആന ഓടിക്കുകയായിരുന്നു. അജി തൊട്ടടുത്തുള്ള വീട്ടിലേക്ക് മതിൽ ചാടി കടന്ന് കയറിയെങ്കിലും പിന്നാലെയെത്തിയ ആന ഗേറ്റ് പൊളിച്ചു കയറി ആക്രമിക്കുകയാണ് ഉണ്ടായത്.
