തിരുവനന്തപുരം . സർവകലാശാലകളിൽ വൈസ് ചാൻസലർമാരെ നിയമിക്കുന്നതിനായി സെർച്ച് കമ്മിറ്റിയിലേക്ക് സർവകലാശാലാ പ്രതിനിധികളെ നൽകാൻ അടിയന്തര നടപടി കൈക്കൊള്ളണമെന്നു വൈസ് ചാൻസിലർമാരോട് ഗവർണർ ആരിഫ് മുഹമ്മദ് ഖാന്റെ നിർദ്ദേശം. കേരള, എം.ജി., കുസാറ്റ്, കണ്ണൂർ, മലയാളം, കെ.ടി.യു., അഗ്രികൾച്ചർ, ഫിഷറീസ് തുടങ്ങിയ സർവകലാശാലകളിലെ വി.സിമാർക്കാണ് രാജ്ഭവനിൽ നിന്ന് ഇത് സംബന്ധിച്ച് കത്തയച്ചു.
ഒരു മാസത്തിനകം സെർച്ച് കമ്മിറ്റിയിലേക്കുള്ള പ്രതിനിധികളെ നൽകാൻ സർവകലാശാലകൾ തയ്യാറാകണം. അല്ലാതെ വന്നാൽ സുപ്രീംകോടതി വിധിയുടെ അടിസ്ഥാനത്തിൽ ഗവർണർ സ്വന്തമായി സെർച്ച് കമ്മിറ്റി രൂപീകരിച്ച് വി.സി നിയമന നടപടികളുമായി മുന്നോട്ടുപോകുമെന്നും കത്തിൽ പറഞ്ഞിട്ടുണ്ട്.
കേരളത്തിലെ മിക്ക സർവകലാശാലകളിലും താത്കാലിക വിസിമാരാണ് നിലവിൽ ഉള്ളത്. അതേസമയം, കേരള വി.സി. ഡോ. മോഹനൻ കുന്നുമേൽ സെർച്ച് കമ്മിറ്റി പ്രതിനിധിയെ തിരഞ്ഞെടുക്കുന്നതിനായുള്ള സെനറ്റ് യോഗം ഫെബ്രുവരി 16-ന് വിളിച്ചുചേർക്കാൻ രജിസ്ട്രാർക്ക് നിർദ്ദേശം നൽകിയിരിക്കുകയാണ്.
