മൈസൂരു . കഴിഞ്ഞ പന്ത്രണ്ടു വർഷം ഭാര്യയെ വീട്ടിനുള്ളിൽ പൂട്ടിയിട്ട് ഭർത്താവ്. പന്ത്രണ്ട് വർഷത്തോളം ഭർത്താവ് തന്നെ പൂട്ടിയിട്ടതായി യുവതി തന്നെയാണ് പറഞ്ഞിരിക്കുന്നത്. സ്ഥലത്ത് പോലീസ് എത്തി രക്ഷപ്പെടുത്തിയ പിറകെയാണ് യുവതിയുടെ ഞെട്ടിക്കുന്ന വെളിപ്പെടുത്തൽ. കർണാടകയിലെ മൈസൂരുവിലാണ് സംഭവം. ലത ( പേര് മാറ്റം) വിവാഹം കഴിഞ്ഞതിൽ പിന്നെ വീട്ടിൽ തന്നെ പൂട്ടിയിട്ടുവെന്നാണ് യുവതി പറയുന്നത്.
ലതക്ക് രണ്ടു കുട്ടികളാണ് ഉള്ളത്. രാവിലെ ജോലിക്ക് പോകുമ്പോൾ ഭർത്താവ് വീട് പൂട്ടി ആണ് പോവുക. വൈകുന്നേരം കുട്ടികൾ സ്കൂൾ വിട്ട് എത്തിയാലും വീടിന് പുറത്ത് നിൽക്കേണ്ട അവസ്ഥയായിരുന്നു. ജോലി കഴിഞ്ഞ് ഭർത്താവ് എത്തുമ്പോഴാണ് വീട് തുറക്കുക. അപ്പോഴാണ് മക്കളും വീടിനകത്തേക്ക് കടക്കുക. ശുചിമുറി ഉപയോഗിക്കാൻ പോലും നേരാംവണ്ണം സാധിച്ചിരുന്നില്ല. ഒരു പെട്ടിക്ക് അകത്താണ് മലമൂത്ര വിസർജ്ജനം നടത്തിയിരുന്നത് – യുവതി പറഞ്ഞു.
യുവതിയുടെ ആരോപണം എന്നാൽ പോലീസ് പൂർണ്ണമായും വിശ്വാസത്തിലെടുത്തിട്ടില്ല. കഴിഞ്ഞ ഏതാനും ആഴ്ചകളായി യുവതി പുറത്തിറങ്ങിയിട്ടില്ലെന്ന് പോലീസ് പറയുന്നു. എന്നാൽ ഭർത്താവി നെതിരെ പരാതിയില്ലെന്നാണ് യുവതി പറഞ്ഞിരിക്കുന്നത്. വീട്ടിൽ നിന്നും മോചിപ്പിക്കപ്പെട്ട യുവതി മാതാപിതാക്കൊപ്പം പോയി. യുവതി ആരോപണ വിധേയനായ ഭർത്താവിന്റെ മൂന്നാം ഭാര്യയാണ്.