കൊച്ചി . മുന്നാറിൽ ഭരണകക്ഷി നേതാക്കളുടെ സഹായത്തോടെ തന്നിഷ്ടക്കാർക്ക് യാതൊരു രേഖകളും ഇല്ലാതെ പട്ടയങ്ങൾ കൊടുക്കുന്ന സി പി എം നീക്കങ്ങൾക്ക് ഹൈക്കോടതിയിൽ നിന്ന് കനത്ത തിരിച്ചടി. ഇടുക്കി ജില്ലയില് കൈവശ ഭൂമിയില് ഉടമസ്ഥത, പാട്ടം തുടങ്ങിയ അവകാശങ്ങള്ക്കു രേഖകളില്ലാത്ത ആര്ക്കും ഇനിയൊരു ഉത്തരവ് ഉണ്ടാവും വരെ പട്ടയം കൊടുക്കരുതെന്ന് ഹൈക്കോടതി.
ഇടുക്കി ജില്ലയ്ക്കു മാത്രമാണു വിധി നിലവില് ബാധകമെങ്കിലും ബന്ധപ്പെട്ട ഭൂപതിവു ചട്ട വ്യവസ്ഥകള് പരിശോധിക്കാന് കോടതി തീരുമാനിച്ചതിനാല് സംസ്ഥാനമൊട്ടാകെ കൈവശ ഭൂമിയിലെ പട്ടയ നടപടികള് എല്ലാം ഇതോടെ നിയമക്കുരുക്കിലുമായി. മുൻ മന്ത്രി എം എം മണിയോട് നേതൃത്വത്തിൽ ഇടുക്കിയിലെ പട്ടയ ലോബിയാണ് കോടതി ഉത്തരവോടെ വെട്ടിലായിരിക്കുന്നത്.
കൈവശക്കാരെന്ന പേരില് മൂന്നാര് മേഖലയില് കയ്യേറ്റക്കാര്ക്കു പട്ടയം നല്കുകയാണെന്ന് ആരോപിച്ച് ‘വണ് എര്ത്ത് വണ് ലൈഫ്’ നല്കിയ ഹര്ജിയിലാണു ജസ്റ്റിസ് എ മുഹമ്മദ് മുഷ്താഖ്, ജസ്റ്റിസ് ശോഭ അന്നമ്മ ഈപ്പന് എന്നിവരുള്പ്പെട്ട ഡിവിഷന് ബെഞ്ചിന്റെ ഉത്തരവ്നി ഉണ്ടായിരിക്കുന്നത്. നിയമപരമായ അവകാശ രേഖകള് ഇല്ലാത്തവരെ കയ്യേറ്റക്കാരായി കാണേണ്ടി വരുമെന്നാണ് കോടതി നിലപാട് എടുത്തിരിക്കുന്നത്.
1964 ലെ കേരള ഭൂപതിവു ചട്ടപ്രകാരം കൈവശഭൂമിക്കു പട്ടയം നല്കുന്നതിനു മാത്രമാണ് ഉത്തരവു ബാധകം. ഇത്തരം പട്ടയ വിതരണം നിര്ത്തിവയ്ക്കാന് ഇടുക്കി കലക്ടര്ക്കും അധികാരപ്പെട്ട മറ്റ് ഉദ്യോഗസ്ഥര്ക്കും കോടതി നിര്ദേശം നല്കി. അതേസമയം, ഭൂരഹിതര്, ആദിവാസികള്, വിമുക്തഭടന്മാര് തുടങ്ങി വിവിധ വിഭാഗങ്ങള്ക്കുള്ള പട്ടയ നടപടികളെ ഈ കോടതി ഉത്തരവ് ബാധിക്കുന്നതല്ല.
ഭൂമി കയ്യേറിയവര്ക്കു പോലും പട്ടയം നല്കാന് അധികാരപ്പെ ടുത്തുന്ന ഭൂപതിവു ചട്ടത്തിന്റെ 5,7 വ്യവസ്ഥകളുടെ സാധുത പരിശോധിക്കുമെന്നും ചീഫ് സെക്രട്ടറിയുടെ വിശദീകരണം തേടുമെന്നും കോടതി പറഞ്ഞിട്ടുണ്ട്. നിയമപരമായ മാനദണ്ഡങ്ങള് പാലിച്ചാണ് കുടിയേറ്റ കര്ഷകര്ക്കും മറ്റും പട്ടയം നല്കുന്നതെന്ന് ഇനിയുള്ള നടപടികളില് സര്ക്കാര് കോടതിയെ ബോധ്യപ്പെടുത്തേ ണ്ടി വരും. ഭൂപതിവ് നിയമത്തിലെ ചട്ടം 11 പ്രകാരം തയ്യാറാക്കിയ പട്ടികയില് ഉള്പ്പെട്ട സ്ഥലം മാത്രമേ പതിച്ചുനല്കാന് ഇനി കഴിയൂ. നിയമത്തിന്റെ ലക്ഷ്യത്തെ തോല്പ്പിക്കുന്ന ചട്ടങ്ങള് സര്ക്കാരിന് തയ്യാറാക്കാനാവില്ലെന്നും കോടതി വ്യക്തമാക്കിയിട്ടുണ്ട്.