ചെന്നൈ . പ്രധാനമന്ത്രി നരേന്ദ്രമോദിക്ക് തമിഴകത്തിൽ ഉജ്ജ്വല സ്വീകരണം. ചെന്നൈയിൽ വൻ ജനാരവത്തോടെ നടന്ന മെഗാ റോഡ് ഷോയിൽ പൂക്കളും തോരണങ്ങളുമായി പതിനായിരക്കണക്കിന് ജനങ്ങൾ ‘ജയ് മോദി ജി’ വിളിച്ച് പ്രധാനമന്ത്രിയെ വരവേറ്റു. പ്രധാനമന്ത്രിയെ കാണുന്നതിനായി സ്ത്രീകളും കുട്ടികളും മുതിർന്നവരുമുൾപ്പെടെ ആയിരങ്ങളാണ് ചെന്നൈയിലെ റോഡിന്റെ ഇരുവശങ്ങളിലും തടിച്ചുകൂടിയത്.
പ്രധാനമന്ത്രി മൂന്ന് ദിവസത്തെ സന്ദർശനത്തിനായിട്ടാണ് തമിഴ്നാട്ടിലെത്തിയത്. ശനി ഞ്യായർ ദിവസങ്ങളിൽ തമിഴ്നാട്ടിലെ വിവിധ ക്ഷേത്രങ്ങളിൽ മോദി ദർശനം നടത്തും. ശനിയാഴ്ച 11 മണിക്ക് തമിഴ്നാട്ടിലെ തിരുച്ചിറപ്പള്ളി ശ്രീ രംഗനാഥസ്വാമിയിൽ ദർശനം നടത്തി ക്ഷേത്രത്തിൽ നടക്കുന്ന പരിപാടികളിൽ മോദി പങ്കെടുക്കുന്നുണ്ട്. ക്ഷേത്രത്തിൽ നടക്കുന്ന രാമായണശ്ലോക പാരായണത്തിലും പ്രധാനമന്ത്രി പങ്കെടുക്കുന്നതാണ്.
ഉച്ചയ്ക്ക് രണ്ട് മണിക്ക് രാമേശ്വരത്തേക്ക് എത്തുന്ന പ്രധാനമന്ത്രി ശ്രീ അരുൾമിഗു രാമനാഥസ്വാമി ക്ഷേത്രത്തിൽ ദർശനം നടത്തും. ക്ഷേത്രത്തിൽ നടക്കുന്ന പ്രത്യേക പൂജകളിലും അദ്ദേഹം പങ്കെടുക്കും. രാമനാഥസ്വാമി ക്ഷേത്രത്തിൽ വൈകുന്നേരം സംഘടിപ്പിച്ചിരിക്കുന്ന ഭജന സന്ധ്യയിലും പ്രധാനമന്ത്രി പങ്കെടുക്കുന്നുണ്ട്. 21-ന് ധനുഷ്കോടി കോതണ്ഡരാമസ്വാമി ക്ഷേത്രത്തിൽ പ്രധാനമന്ത്രി ദർശനം നടത്തുന്നതാണ്.