തൃശൂരിൽ ജനുവരി 3 ന് എത്തുന്ന പ്രധാനമന്ത്രി നരേന്ദ്ര മോദിക്ക് മുന്നിൽ മിനി പൂരം ഒരുക്കാനൊരുങ്ങി പാറമേക്കാവ് ദേവസ്വം. പ്രധാനമന്ത്രിയുടെ റോഡ് ഷോയോട് അനുബന്ധിച്ച് പൂരമൊരുക്കാൻ സുരക്ഷാ അനുമതി തേടിയിട്ടുണ്ട്. പൂരം പ്രതിസന്ധി പ്രധാനമന്ത്രി യുടെ ശ്രദ്ധയിൽ കൊണ്ടു വരാൻ ലക്ഷ്യം വെച്ചാണ് 15 ആനകളെ അണിനിരത്തി മിനി പൂരം നടത്തുന്നത്.
തൃശൂരില് എത്തുന്ന പ്രധാനമന്ത്രിയുടെ റോഡ് ഷോ ജനുവരി മൂന്നിന് നഗരത്തിൽ നടക്കും. ഈ സമയത്ത് മിനി പൂരമൊരുക്കാനാണ് അനുമതി തേടിയത്. തൃശൂര് പൂരം നടത്തിപ്പുമായി ബന്ധപ്പെട്ട് കേന്ദ്രം ധനസഹായം പ്രഖ്യാപിക്കാനുള്ള സാധ്യത ഉണ്ടെന്ന റിപ്പോർട്ടുകളാണ് പുറത്ത് വരുന്നത്. നിലവില് പൂരം പ്രദര്ശനത്തിന്റെ തറ വാടകയുമായി ബന്ധപ്പെട്ട് കൊച്ചിന് ദേവസ്വം ബോര്ഡുമായി തര്ക്കം നിലനില്ക്കുന്നുണ്ട്.
മോദി തൃശൂർ തേക്കിന്കാട് മൈതാനത്ത് നടക്കുന്ന സ്ത്രീ ശക്തി സംഗമത്തിലും പങ്കെടുക്കും. അങ്കണവാടി ടീച്ചര്മാര്, ആശാ വര്ക്കര്മാര്, തൊഴിലുറപ്പ് തൊഴിലാളികള്, കുടുംബശ്രീ പ്രവര്ത്തകര്, വനിതാ സംരംഭകര്, സാമൂഹിക പ്രവര്ത്തകര്, സാംസ്കാരിക രംഗത്ത് പ്രവര്ത്തിക്കുന്ന സ്ത്രീകള്, തെരഞ്ഞെടുക്കപ്പെട്ട തദ്ദേശഭരണ സ്ഥാപനങ്ങളിലെ അംഗങ്ങള് തുടങ്ങി വ്യത്യസ്ത വിഭാഗത്തിലുള്ള രണ്ട് ലക്ഷത്തോളം സ്ത്രീകളെ പരിപാടിയിൽ പങ്കെടുപ്പിക്കാനാണ് ബി ജെ പി ലക്ഷ്യമിട്ടിരിക്കുന്നത്.