കോട്ടയം . കേരളം ഭരിക്കുന്നവരുടെ ദുഷ്ട ചെയ്തി കൊണ്ട് ഒട്ടു മിക്ക കേന്ദ്ര പദ്ധതികളും പാവങ്ങളുടെ കരങ്ങളിലേക്ക് എത്തുന്നില്ലെന്നു മുൻ എംപിയും നടനുമായ സുരേഷ് ഗോപി. കേന്ദ്ര പദ്ധതികളുടെ കണക്കെടുത്താൽ കേരളം നാണിച്ച് തല കുനിക്കണം. കേന്ദ്ര പദ്ധതികളുടെ ഗുണഭോക്താക്കൾ കേരളത്തിൽ കുറവാണ്. കേരളം ഭരിക്കുന്നവരുടെ ദുഷ്ചെയ്തിയാണിതിന് മുഖ്യ കാരണം. കോട്ടയം പാലായിൽ വികസിത് ഭാരത് സങ്കൽപ് യാത്ര ഉദ്ഘാടനം ചെയ്ത് സംസാരിക്കുകയായിരുന്നു സുരേഷ് ഗോപി.
കേരളം ഭരിക്കുന്നവരുടെ ദുഷ്ചെയ്തിയെ ചോദ്യം ചെയ്യാൻ ചങ്കൂറപ്പുള്ള ഒരു നേതാവും ഭരണപക്ഷത്ത് ഇല്ല. കേന്ദ്ര പദ്ധതികൾ ജനങ്ങൾ അറിയാൻ പാടില്ലെന്ന തരത്തിലാണ് സംസ്ഥാന സർക്കാറിന്റെ പ്രവർത്തനം. ജനങ്ങളുടെ ഉന്നമനത്തിനും പുരോഗതിക്കുമായി പല പദ്ധതികളും കേന്ദ്രം നടപ്പാക്കുന്നുണ്ട്. കേരളം ഭരിക്കുന്നവരുടെ ദുഷ്ചെയ്തി കൊണ്ട് പാവങ്ങളുടെ കരങ്ങളിലേക്ക് ഇവ ഒന്നും എത്തുന്നില്ല- സുരേഷ് ഗോപി പറഞ്ഞു.
ഭാരതീയ ജനതാ പാർട്ടിക്കെതിരെ ഏറ്റവുമധികം എതിർപ്പ് പ്രകടിപ്പിച്ചിട്ടുള്ള ഡിഎംകെ ഭരിക്കുന്ന നാട്ടിൽ ആവാസ് യോജന, മുദ്ര തുടങ്ങി നിരവധി പദ്ധതികളുടെ ഗുണങ്ങൾ ജനങ്ങൾക്ക് ലഭിച്ചു വരുന്നു. സർക്കാരിന്റെ ദുഷ്ചെയ്തി കൊണ്ട് അർഹതപ്പെട്ട ഒരുപാട് പേരാണ് കഷ്ടത അനുഭവിക്കുന്നത്. സുരേഷ് ഗോപി പറഞ്ഞു.