കൽപ്പറ്റ. പെരിയയിൽ ഏറ്റുമുട്ടലിനിടെ രക്ഷപ്പെട്ട കമ്യൂണിസ്റ്റ് ഭീകരർക്കായി ലുക്ക് ഔട്ട് നോട്ടീസ് പുറപ്പെടുവിച്ച് കേരള പോലീസ്. കണ്ണൂർ സിറ്റി പോലീസാണ് ചിക്കമംഗളൂരു സ്വദേശികളായ സുന്ദരി, ലത എന്നിവർക്കെതിരെ ലുക്ക് ഔട്ട് നോട്ടീസ് പുറപ്പെടുവിച്ചിരി ക്കുന്നത്.
തലശ്ശേരി നഗരത്തിൽ ബുധനാഴ്ച രാവിലെ കമ്യൂണിസ്റ്റ് ഭീകര സംഘടനയിലെ വനിതകൾ എത്തിയതായി പോലീസിന് വിവരം കിട്ടിയിരുന്നു. കബനിദളം പ്രവർത്തകരാണ് പോലീസിന്റെ കണ്ണുവെട്ടിച്ച് രക്ഷപ്പെടാൻ ശ്രമിച്ചതെന്നാണ് പുറത്ത് വരുന്ന റിപ്പോർട്ടുകൾ.
തലശ്ശേരിയിൽ ഇതേ തുടർന്ന് പോലീസ് പരിശോധന നടത്തി. തലശ്ശേരി പുതിയ ബസ് സ്റ്റാൻഡ്, പഴയ ബസ് സ്റ്റാൻഡ്, റെയിൽവേ സ്റ്റേഷൻ പരിസരം, കടൽപ്പാലം, കടൽത്തീരപ്രദേശങ്ങൾ എന്നിവിടങ്ങളിലടക്കം പോലീസ് നീരിക്ഷണം ശക്തമാക്കി. കോഴിക്കോട്, കണ്ണൂർ, വയനാട് ജില്ലകളിലെ എല്ലാ പോലീസ് സ്റ്റേഷനുകളോടും കൺട്രോൾ റൂമുകളോടും ജാഗ്രത പാലിക്കാൻ ജില്ലാ പോലീസ് മേധാവിമാർ നിർദ്ദേശം നൽകിയിരിക്കുകയാണ്.