കർണാടക സർക്കാരിന് ബോംബ് ഭീഷണി ഇമെയിൽ ലഭിച്ചു. ശനിയാഴ്ച ബംഗളൂരുവിൽ സ്ഫോടനമുണ്ടാകുമെന്നാണ് മെയിലിൽ മുന്നറിയിപ്പ് നൽകിയിരിക്കുന്നത്. ഉച്ചക്ക് ശേഷം 2.48ന് നടക്കുന്ന സ്ഫോടനം നഗരത്തെ കുലുക്കുമെന്ന് ഇമെയിലിൽ പറഞ്ഞിരിക്കുന്നു.
മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ, ആഭ്യന്തര മന്ത്രി, ബെംഗളൂരു പോലീസ് കമ്മീഷണർ എന്നിവർക്ക് ഷാഹിദ് ഖാൻ എന്ന വ്യക്തിയാണ് ഇമെയിലിൽ അയച്ചിരിക്കുന്നത്. റെസ്റ്റോറൻ്റുകൾ, ക്ഷേത്രങ്ങൾ, ബസുകൾ, ട്രെയിനുകൾ തുടങ്ങിയ തിരക്കേറിയ സ്ഥലങ്ങളെ സ്ഫോടനം കുലുക്കിയേക്കാമെന്ന് ഇമെയിൽ പറഞ്ഞിട്ടുള്ളത്.
പൊതുപരിപാടികൾക്കിടെ ബോംബ് വയ്ക്കുമെന്നും അയച്ചയാൾ മുന്നറിയിപ്പ് നൽകിയിട്ടുണ്ട്. സ്ഫോടനം നടത്തുന്നതിൽ നിന്ന് വിട്ടുനിൽക്കാൻ കുറ്റവാളികൾ 20 കോടിയിലധികം രൂപ മോചനദ്രവ്യം ആവശ്യപ്പെട്ടതായും ഇമെയിലിൽ പറഞ്ഞിരിക്കുന്നു. സംഭവത്തിൽ പോലീസ് സ്വമേധയാ കേസെടുത്ത് അന്വേഷണം നടത്തി വരുന്നു.
