തിരുവല്ല . തിരുവല്ലയിൽ നിന്ന് കാണാതായ ഒമ്പതാം ക്ലാസ് വിദ്യാർത്ഥിനിയെ പോലീസ് സ്റ്റേഷനിൽ എത്തിച്ച് രക്ഷപെടാൻ ശ്രമിച്ച രണ്ടു യുവാക്കളും പിടിയിലായി. പുലർച്ചെ നാലരയോടെയാണ് പെൺകുട്ടി തിരുവല്ല പോലീസ് സ്റ്റേഷനിൽ എത്തിച്ച് മുങ്ങിയ രണ്ട് യുവാക്കളെ പോലീസ് പിടികൂടുകയായിരുന്നു. തൃശ്ശൂർ സ്വദേശികളായ അതുൽ, അജിൽ എന്നിവരാണ് പിടിയിൽ ആയിരിക്കുന്നത്. ഇവരെ ഒരാളെ പോലീസ് പിന്തുടർന്ന് ബസ്സിൽ നിന്ന് പിടികൂടുകയാണ് ഉണ്ടായത്.
പെൺകുട്ടിയുടെയും ഒപ്പം ഉണ്ടായിരുന്നവരുടെയും സി സി ടിവി ദൃശ്യങ്ങൾ പോലീസ് പുറത്തുവിട്ടതാണ് കേസന്വേഷണത്തിൽ ഗുണകരമായത്. തുടർന്നാണ് കുട്ടിയെ ഒപ്പം ഉണ്ടായിരുന്നവർ പോലീസ് സ്റ്റേഷനിലേക്ക് എത്തിക്കുന്നത്. വെള്ളിയാഴ്ച രാവിലെ സ്കൂളിലേക്ക് പോകുന്നെന്ന് പറഞ്ഞ് ഇറങ്ങിയ പെൺകുട്ടിയെ പിന്നീട് കാണാതാവുകയായിരുന്നു.
ഉച്ചയായിട്ടും പെൺകുട്ടി വീട്ടിൽ എത്താത്തതിനെ തുടർന്ന് പെൺകുട്ടിയുടെ അമ്മ സ്കൂളിലും പിന്നീട് ട്യൂഷൻ ക്ലാസിലും അന്വേഷിച്ചിട്ടും കണ്ടെത്താൻ കഴിയാതായതോടെ പരാതിയുമായി പോലീസിനെ സമീപിക്കുകയായിരുന്നു. ബന്ധുവീടുകളിലും കുട്ടി എത്തിയിട്ടില്ലെന്ന് ഉറപ്പായതോടെ പോലീസ് പ്രദേശത്തെ സി സി ടിവി ദൃശ്യങ്ങൾ ഉൾപ്പെടെ പരിശോധിക്കുന്നത്. ഇതിൽ രണ്ട് ആൺകുട്ടികൾക്ക് ഒപ്പം പെൺകുട്ടി സംസാരിച്ച് നിൽക്കുന്ന ദൃശ്യങ്ങൾ പോലീസിന് കിട്ടി. ഇതിന്റെ അടിസ്ഥാനത്തിൽ നടത്തിയ അന്വേഷണത്തിൽ കുട്ടിയെ കണ്ടെത്താനാകാതെ വന്നപ്പോഴാണ് ചിത്രം ഉൾപ്പെടെ പുറത്തുവിടുന്നത്. ബസ്സിൽ നിന്നുള്ള ദ‍ൃശ്യങ്ങളാണ് പോലീസ് പുറത്തുവിട്ടിരുന്നത്.
