തിരുവനന്തപുരം . കടുവയെ കിടുവ പിടിച്ചെന്ന പഴം ചൊല്ല് പോലൊരു വാർത്ത. മുഖ്യമന്ത്രി പിണറായി വിജയന്റെ വാഹനത്തിന് പിഴ ഈടാക്കി മോട്ടോർ വാഹന വകുപ്പ്. മുഖ്യമന്ത്രിയുടെ കിയ കാർണിവൽ കാറിനാണ് മോട്ടോർ വാഹന വകുപ്പ് 500 രൂപ പിഴ ഈടാക്കിയിരിക്കുന്നത്. വാഹനത്തിന്റെ മുൻ സീറ്റിലിരുന്ന ഉദ്യോഗസ്ഥൻ സീറ്റ് ബെൽറ്റ് ഇടാത്തതിനാലാണ് പിഴയിട്ടതെന്ന് മോട്ടോർ വാഹന വകുപ്പ് വ്യക്തമാക്കുന്നത്.
മന്ത്രിമാരുടെ നവകേരള സദസിന്റെ ഭാഗമായി മുഖ്യമന്ത്രിയുടെ കിയ കാർണിവൽ മുണ്ടക്കയം – കുട്ടിക്കാനം റോഡിൽ എത്തിയപ്പോൾ സീറ്റ് ബെൽറ്റ് ധരിക്കാതെ ഇരിക്കുന്ന ഉദ്യോഗസ്ഥന്റെ ചിത്രം ക്യാമറയിൽ പതിയുകയായിരുന്നു. കഴിഞ്ഞ ഡിസംബർ 12നാണ് സംഭവം. നവകേരള സദസിന്റെ ഭാഗമായി മന്ത്രിമാരുടെ ബസിന് എസ്‌കോർട്ട് പോയിരുന്ന വാഹനവ്യൂഹങ്ങളിൽ മുഖ്യമന്ത്രിയുടെ കിയ കാർണിവൽ കാറും ഉണ്ടായിരുന്നു.
ഇതിലുണ്ടായിരുന്ന ഉദ്യോഗസ്ഥർ സീറ്റ് ബെൽറ്റ് ധരിക്കാത്തത് ക്യാമറയിൽ പതിഞ്ഞതോടെയാണ് വാഹനത്തിന് പിഴ ചുമത്തിയിരിക്കുന്നത്. നിരത്തിലെ ട്രാഫിക് നിയമലംഘനത്തിന് വാഹനം എഐ ക്യാമറയില്‍ കുടുങ്ങുകയായിരുന്നു. നവകേരള സദസിനിടെയുള്ള യാത്രയിലായിരുന്നു നിയമലംഘനം ക്യാമറയില്‍ കുടുങ്ങിയത്.
