പത്തനംതിട്ട . ലോക്‌സഭാ തെരഞ്ഞെടുപ്പിൽ പത്തനംതിട്ട മണ്ഡലത്തിൽ പി.സി.ജോര്‍ജിനെ കൂടാതെ അദ്ദേഹത്തിന്‍റെ മകനും ജില്ലാ പഞ്ചായത്ത് അംഗവുമായ ഷോൺ ജോർജിന്റെയും സിനിമാ നടൻ ഉണ്ണി മുകുന്ദന്റെയും പേരുകൾ കൂടി പരിഗണിച്ച് ബിജെപി.
ലോക്‌സഭ തെരഞ്ഞെടുപ്പില്‍ ഏതെങ്കിലും മണ്ഡലത്തില്‍ മത്സരിക്കുകയാണെങ്കില്‍ അത് പത്തനംതിട്ട മണ്ഡലത്തില്‍ ആയിരിക്കുമെന്ന് പി.സി.ജോര്‍ജ് പറഞ്ഞിരുന്നു. പാര്‍ട്ടി തീരുമാനം എന്താണെങ്കിലും അത് അനുസരിക്കുമെന്നും അദ്ദേഹം പറഞ്ഞിരുന്നു. 2019ല്‍ മണ്ഡലത്തില്‍ മത്സരിച്ച കെ.സുരേന്ദ്രന്‍ ഇക്കുറി മത്സരരംഗത്തുണ്ടാവില്ലെന്ന് വ്യക്തമാക്കിയിട്ടുണ്ട്.
യുവാവായ, ക്രൈസ്തവ വിഭാഗത്തില്‍ നിന്നുള്ള നേതാവ് എന്നതാണ് ഷോണിനെ പരിഗണിക്കാന്‍ ബിജെപിയെ പ്രേരിപ്പിക്കുന്നത്. സിനിമാ താരമെന്ന നിലയിലാണ് ഉണ്ണി മുകുന്ദനെ പാർട്ടി പരിഗണിക്കുന്നത്. ക്രൈസ്തവ വോട്ടുകള്‍ കൂടി സമാഹരിക്കാന്‍ കഴിയുന്ന ഒരു സ്ഥാനാര്‍ഥിയാണെങ്കില്‍ വിജയിക്കാന്‍ കഴിയുമെന്ന കണക്കുകൂട്ടലിലാണ് പി.സി ജോര്‍ജിനെയും ഷോണ്‍ ജോര്‍ജിനെയും പരിഗണിക്കുന്നത്.
ഓരോ തെരഞ്ഞെടുപ്പ് കഴിയുമ്പോഴും പത്തനംതിട്ടയിൽ ബിജെപി വോട്ട് ശതമാനം ഉയര്‍ത്തുകയാണ്. പി സി യുടെ ബി ജെ പി പ്രവേശനത്തിന് മുൻപ് ബിജെപി മുന്‍ സംസ്ഥാന അധ്യക്ഷന്‍ കുമ്മനം രാജശേഖരന്‍, നടന്‍ ഉണ്ണി മുകുന്ദന്‍ എന്നിവരുടെ പേരുകളാണ് നേരത്തെ ബി ജെ പി മണ്ഡലത്തിലേക്ക് പരിഗണിക്കുന്നതാണ് പറഞ്ഞിരുന്നത്.
