ആഗ്ര . താജ്മഹലില്‍ ഉറൂസ് നടത്തുന്നതിനെതിരെ ആഗ്ര കോടതിയിൽ ഹിന്ദുമഹാസഭയുടെ ഹര്‍ജി. ഈ വര്‍ഷത്തെ ഉറൂസ് ഫെബ്രുവരി ആറ് മുതല്‍ എട്ട് വരെ നടക്കാനിരിക്കെയാണ് ഹര്‍ജി. ഉറൂസ് തടയാന്‍ കോടതി നിരോധന ഉത്തരവിറക്കണമെന്നാണ് ഹിന്ദുമഹാസഭ ഉന്നയിക്കുന്ന ആവശ്യം. ഹിന്ദുമഹാസഭയുടെ ഹര്‍ജിയില്‍ കോടതി മാര്‍ച്ച് 4ന് വാദം കേള്‍ക്കും.
താജ്മഹല്‍ പൈതൃക സ്മാരകങ്ങളുടെ പട്ടികയിലാണെന്ന് ചൂണ്ടിക്കാട്ടിയാണ് ഉറൂസിനെതിരെ ഹിന്ദു മഹാസഭ ഹര്‍ജി നല്‍കിയിട്ടുള്ളത്. പൈതൃക സ്മാരകത്തില്‍ മതപരമായ ആചാരങ്ങള്‍ നടത്തുന്നത് ശരിയല്ലെന്നാണ് ഹര്‍ജിയിൽ ഉന്നയിച്ചിരിക്കുന്ന വാദം. പുരാതന ഹിന്ദു മതവിശ്വാസങ്ങളുമായി ബന്ധപ്പെട്ട കാര്യങ്ങളും ഹര്‍ജിയില്‍ പറഞ്ഞിട്ടുണ്ട്. ഉറൂസിനോടനുബന്ധിച്ച് താജ്മഹലില്‍ സൗജന്യ പ്രവേശനം അനുവദിക്കുന്നതിനെയും ഹിന്ദുമഹാസഭ ഹർജിയിൽ ചോദ്യം ചെയ്യുന്നുണ്ട്.
