ചെന്നൈ . 2024 ലോക്സഭ തിരഞ്ഞെടുപിന് മുന്നോടിയായി നടൻ വിജയ് രാഷ്ട്രീയ പാർട്ടി രൂപീകരിച്ചേക്കുമെന്ന് തമിഴ് മാധ്യമങ്ങൾ.. ഇതുമായി ബന്ധപ്പെട്ട് ആരാധകരുടെ കൂട്ടായ്മ യോഗത്തിൽ നിർണായക ചർച്ചകൾ നടന്നതായ വിവരങ്ങൾ ആണ് പുറത്ത് വന്നിട്ടുള്ളത്.. പുതുതായി രൂപീകരിക്കുന്ന രാഷ്ട്രീയ പാർട്ടി ഒരു മാസത്തിനുളളിൽ തിരഞ്ഞെടുപ്പ് കമ്മിഷനിൽ രജിസ്റ്റർ ചെയ്തേക്കും. എന്നാൽ 2026ലെ നിയമസഭ തിരഞ്ഞെടുപ്പിൽ മത്സരിച്ചാൽ മതിയെന്നാണ് വിജയുടെ തീരുമാനം.
രാഷ്ട്രീയ പാർട്ടി രൂപീകരിക്കുന്നതിന് മുന്നോടിയായി സംസ്ഥാനത്തെ നിയമസഭ മണ്ഡലങ്ങളെ കേന്ദ്രീകരിച്ച് പ്രവർത്തനങ്ങളിൽ ഏർപ്പെടാൻ ആരാധക സംഘടനയായ വിജയ് മക്കൾ ഈയക്കം തീരുമാനിച്ചിട്ടുണ്ട്. സൗജന്യ ട്യൂഷൻ സെന്റുറുകൾ, വായനശാലകൾ, ക്ലിനിക്കുകൾ, നിയമസഹായ കേന്ദ്രങ്ങൾ എന്നിവ കൂട്ടായ്മ ഇതിനോടകം തന്നെ വിവിധ സ്ഥലങ്ങളിൽ ആരംഭിച്ചിട്ടുണ്ട്. നേരത്തെ ലിയോ ചിത്രത്തിന്റെ പ്രമോഷനിടെ രാഷ്ട്രീയത്തിലേക്ക് പ്രവേശിക്കുമെന്ന സൂചന വിജയ് നൽകിയിരുന്നതാണ്. സംസ്ഥാനത്തെ 234 മണ്ഡലങ്ങളിലും ബൂത്ത് കമ്മിറ്റികൾ രൂപീകരിക്കാൻ മക്കൾ ഇയക്കത്തെ ചുമതലപ്പെടുത്തിയതായും തമിഴ് മാധ്യമങ്ങൾ റിപ്പോർട്ട് ചെയ്തിട്ടുണ്ട്.
നേരത്തെ തമിഴ്നാട്ടിൽ നിയമസഭ തിരഞ്ഞെടുപ്പ് നടക്കുന്നതിന് മുമ്പ് വിജയ് രാഷ്ട്രീയത്തിൽ പ്രവേശിക്കുമെന്ന റിപ്പോർട്ടുകൾ പുറത്ത് വന്നിരുന്നു. എന്നാൽ പിന്നീട് അതേ കുറിച്ചുള്ള വിവരങ്ങൾ ഒന്നും ഉണ്ടായില്ല. വിജയുടെ രാഷ്ട്രീയപ്രവേശന സാദ്ധ്യത വിലയിരുത്താൻ വോട്ടർമാർക്കിടയിൽ സർവേയും നടത്തിയിരുന്നു. വിജയ് ഫാൻസ് അസോസിയേഷനും സാമൂഹിക സേവന സംഘടനായ വിജയ് മക്കൾ ഇയക്കവുമാണ് സർവേയ്ക്ക് നേതൃത്വം നൽകിയിരുന്നത്.
വിജയ് ആരാധകരുടെ സംഘടനയിലേക്ക് കൂടുതൽ ആൾക്കാരെ ചേർക്കാനുള്ള നടപടികളും അതേസമയം, തുടങ്ങിയിട്ടുണ്ട്. ഇത് രാഷ്ട്രീയ പാർട്ടി രൂപീകരണം ലക്ഷ്യമിട്ടാണെന്നാണ് വിലയിരുത്ത പ്പെടുന്നത്. സന്നദ്ധപ്രവർത്തനങ്ങൾക്കൊപ്പം വിവിധ ആഘോഷ പരിപാടികളിൽ പങ്കെടുക്കാനും നിർദ്ദേശം നൽകിയിരിക്കുകയാണ്