പ്രധാന മന്ത്രി നരേന്ദ്ര മോദിക്കൊപ്പം വൻ താര പ്രഭയിലായിരിക്കും സുരേഷ് ഗോപിയുടെ മകൾ ഭാഗ്യയുടെ വിവാഹം ഗുരുവായൂരിൽ നടക്കുക. വിവാഹ ചടങ്ങിൽ പങ്കെടുക്കാൻ ഗുരുവായൂരിലേക്ക് വൻ താരനിര തന്നെ എത്തുന്നുണ്ട്. മമ്മൂട്ടി, മോഹൻലാൽ, ദുൽഖർ, കുഞ്ചാക്കോ ബോബൻ, ടൊവിനോ തുടങ്ങി നിരവധി താരങ്ങൾ മംഗള മുഹൂർത്തത്തിന് സാക്ഷികളാകാൻ എത്തും. 19ന് സിനിമാ താരങ്ങൾക്കും രാഷ്ട്രീയ പ്രമുഖർക്കുമായി കൊച്ചിയിൽ പ്രത്യേക ചടങ്ങ് നടത്തുന്നുണ്ട്. നാട്ടുകാർക്കും സുഹൃത്തുക്കൾക്കുമായി 20 ന് തിരുവനന്തപുരത്തും ചടങ്ങുകളുണ്ട്.
ഭാഗ്യയുടേയും ശ്രേയസിന്റേയും വിവാഹത്തിന് പ്രധാനമന്ത്രി നരേന്ദ്രമോദി എത്തുന്നുണ്ട്. സുരേഷ് ഗോപിയുടേയും രാധികയുടേയും മൂത്ത മകളാണ് ഭാഗ്യ. ഗോകുൽ സുരേഷ്, മാധവ് സുരേഷ്, ഭാവ്നി സുരേഷ് എന്നിവരാണ് സുരേഷ് ഗോപിയുടെ മറ്റു മക്കൾ. വരൻ മാവേലിക്കര സ്വദേശികളായ മോഹന്റെയും ശ്രീദേവിയുടെയും മകനായ ശ്രേയസ് ആണ്. ബിസിനസ്സുകാരനാണ് ശ്രേയസ്.
നരേന്ദ്ര മോദി ഗുരുവായൂരിൽ എത്തുമ്പോൾ സുരേഷ് ഗോപി അദ്ദേഹത്തിന് ഒരു സ്വർണ തളിക സമ്മാനിക്കുന്നുണ്ട്. സ്വർണ കരവിരുതിൽ വിദഗ്ധനായ അനു അനന്തൻ ആണ് സ്വർണ തളിക നിർമ്മിച്ചിരിക്കുന്നത്. എസ് പി ജി ഉദ്യോഗസ്ഥർ തളിക പരിശോധിച്ചിരുന്നു. രണ്ട് ദിവസത്തെ സന്ദർശനത്തിനായി കേരളത്തിലെത്തുന്ന പ്രധാനമന്ത്രി എറണാകുളം മറൈൻഡ്രൈവിൽ ബിജെപി ‘ശക്തികേന്ദ്ര പ്രമുഖരുടെ’ സമ്മേളനത്തിൽ പ്രസംഗിച്ചശേഷമാണ് ഡൽഹിക്ക് മടങ്ങുക.