ഇടുക്കി . വണ്ടിപ്പെരിയാറിൽ ക്രൂര പീഡനത്തിനിരയായി കൊല്ലപ്പെട്ട ആറ് വയസുകാരിയുടെ പിതാവിനെ ആക്രമിച്ച പ്രതി പാൽ രാജിന്റെ അറസ്റ്റ് പോലീസ് രേഖപ്പെടുത്തി. വധശ്രമം ഉൾപ്പെടെയുള്ള വകുപ്പു കൾ പ്രതിക്കെതിരെ ചുമത്തിയിട്ടുണ്ട്. ആറ് വയസുകാരിയുടെ കുടുംബത്തിന് നേരെ ഉണ്ടായ ആക്രമണത്തിന്റെ പശ്ചാത്തലത്തിൽ പെൺകുട്ടിയുടെ കുടുംബത്തിന് സുരക്ഷ ഉറപ്പാക്കുമെന്ന് പോലീസ് പറഞ്ഞിട്ടുണ്ട്.
ശനിയാഴ്ചയാണ് വണ്ടിപ്പെരിയാറിൽ വെച്ച് കൊല്ലപ്പെട്ട ആറ് വയസുകാരിയുടെ പിതാവിനെ കേസിൽ കുറ്റവിമുക്തനാക്കിയ അർജുന്റെ ബന്ധു പാൽ രാജ് ആക്രമിക്കുന്നത്. പെൺകുട്ടിയുടെ പിതാവും മുത്തച്ഛനും സാരമായി പരിക്കേറ്റ് കോട്ടയം മെഡിക്കൽ കോളേജിൽ ചികിൽസയിലാണ്. പ്രകോപനം ഉണ്ടാക്കിയത് പാൽരാജ് ആണെന്നാണ് എഫ്ഐ ആരിൽ പറഞ്ഞിരിക്കുന്നത്. കുട്ടിയുടെ പിതാവിനെ കൊല്ലണമെന്ന ഉദ്ദേശത്തോടെയായിരുന്നു ആക്രമണം നടത്തുന്നത്.
പെൺകുട്ടിയുടെ കുടുംബത്തിന് നീതി ഉറപ്പാക്കണം എന്ന് ആവശ്യവുമായി വണ്ടിപ്പെരിയാറിൽ കോൺഗ്രസ് ഞായറാഴ്ച സ്ത്രീജ്വാല പ്രതിഷേധ പരിപാടി നടത്തും. വൈകിട്ട് 3ന് ബഹുജന റാലിയക്ക് ശേഷം നടക്കുന്ന പൊതുസമ്മേളനം എ.ഐ.സി.സി ജനറൽ സെക്രട്ടറി കെ.സി വേണുഗോപാൽ എം.പി ഉദ്ഘാടനം ചെയ്യും. എ.ഐ.സി.സി.ജനറൽ സെക്രട്ടി ദീപാ ദാസ് മുൻഷി, പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ളവർ പരിപാടിയിൽ പങ്കെടുക്കുന്നുണ്ട്.