തിരുവനന്തപുരം . ഗതാഗത വകുപ്പ് തനിക്കു കിട്ടിയാൽ അതിനെ അടിമുടി നവീകരിക്കുമെന്ന് നിയുക്ത മന്ത്രി കെ ബി ഗണേഷ് കുമാര്‍. ഗതാഗത വകുപ്പാണ് ലഭിക്കുന്നതെങ്കിൽ മെച്ചപ്പെടുത്താൻ കഴിയുമെന്നാണ് കരുതുന്നതെന്ന് ഗണേഷ് കുമാര്‍ ഒരു ന്യൂസ് ചാനലിനോട് പറഞ്ഞു. പൊതുഗതാഗതത്തെ മെച്ചപ്പെടുത്തുന്ന തിനായി മനസില്‍ ഒരു ആശയമുണ്ട്. അത് മുഖ്യമന്ത്രിക്ക് മുന്നില്‍ അവതരിപ്പിച്ച് അദ്ദേഹം അംഗീകരിച്ചാല്‍ കേരളത്തിലെ മുക്കിലും മുലയിലും ജനങ്ങള്‍ക്ക് വണ്ടി കിട്ടുന്ന ഒരു പുതിയ സംവിധാനം കൊണ്ടു വരും – ഗണേഷ് കുമാര്‍ പറഞ്ഞു.
തന്നെ വിവാദങ്ങളിലേക്ക് വലിച്ചിഴക്കരുത്. മന്ത്രിയായി സത്യപ്രതിജ്ഞ ചെയ്താല്‍ ഉദ്ഘാടനങ്ങള്‍ക്ക് പോകില്ല. ആരും വിളിക്കേണ്ട. അത്തരം കാര്യങ്ങളില്‍ നിന്ന് തന്നെ ഒഴിവാക്കണം. ശ്രദ്ധ മുഴുവന്‍ വകുപ്പ് മെച്ചപ്പെടുത്തുന്ന കാര്യങ്ങളിൽ മാത്രമായിരിക്കും -ഗണേഷ് കുമാര്‍ പറഞ്ഞു. അസാധ്യമായി ഒന്നുമില്ലെന്ന് പറഞ്ഞ കെ ബി ഗണേഷ് കുമാര്‍, മുഖ്യമന്ത്രി അനുവദിച്ചാൽ മാത്രം സിനിമയില്‍ അഭിനയിക്കുകയുള്ളൂ എന്നും പറയുകയുണ്ടായി.
കെ ബി ഗണേഷ് കുമാര്‍ 2001 മുതല്‍ പത്തനാപുരത്തിന്‍റെ പ്രതിനിധിയാണ്.. 2001 ല്‍ എ കെ ആന്റണി സര്‍ക്കാരില്‍ ഗതാഗത മന്ത്രിയായിരുന്ന ഗണേഷ് പിന്നീട് 22 മാസങ്ങള്‍ക്ക് ശേഷം പിതാവ് ബാലകൃഷ്ണപിള്ളയ്ക്ക് വേണ്ടി സ്ഥാനമൊഴിയുകയായിരുന്നു. 2011 ല്‍ ഉമ്മന്‍ചാണ്ടി സര്‍ക്കാരില്‍ വനം, കായികം, സിനിമ എന്നി വകുപ്പുകളുടെ മന്ത്രിയായിരുന്നു.
