ഹമാസിനെതിരായ യുദ്ധം നിലനില്പ്പിന് വേണ്ടിയുള്ളതാണെന്നും അന്താരാഷ്ട്ര സമ്മര്ദവും അസഹനീയമായ നഷ്ടങ്ങളും തരണം ചെയ്ത് അന്തിമ വിജയം വരെ അത് തുടരുമെന്നും ഇസ്രായേല് പ്രധാനമന്ത്രി ബെഞ്ചമിന് നെതന്യാഹു. ഗാസയില് ഹമാസ് ബന്ദികളാക്കിയ കൂടുതല് പേരെ രക്ഷപ്പെടുത്താന് പുതിയ ചര്ച്ചകള് നടക്കുന്നതായി ഇസ്രായേല് പ്രധാനമന്ത്രി സൂചന നല്കി.
ഇസ്രായേല്-ഹമാസ് യുദ്ധത്തില് മധ്യസ്ഥത വഹിക്കുന്ന ഖത്തര് പ്രധാനമന്ത്രിയുമായി ഇസ്രായേലിന്റെ മൊസാദ് രഹസ്യാന്വേഷണ ഏജന്സി മേധാവി കൂടിക്കാഴ്ച നടത്തിയെന്ന റിപ്പോര്ട്ടിന് പിന്നാലെയാണ് നെതന്യാഹു ഇക്കാര്യം പറഞ്ഞിരിക്കുന്നത്. ഗാസയിലെ ഹമാസിനുമേല് ഇസ്രായേല് സമ്മര്ദ്ദം തുടരും. ഗാസയിലെ ഹമാസിലുള്ള ഭീകരസംഘത്തെ ഉന്മൂലനം ചെയ്യുമെന്നും നെതന്യാഹു ആവര്ത്തിച്ചു പറഞ്ഞിട്ടുണ്ട്.
‘നിലനില്പ്പിന് വേണ്ടിയുള്ള ഒരു യുദ്ധത്തിലാണ് ഞങ്ങള്. അതില് അന്താരാഷ്ട്ര സമ്മര്ദ്ദം വകവയ്ക്കാതെയും നമ്മുടെ വീണുപോയ യോദ്ധാക്കളുടെ നഷ്ടങ്ങള്ക്കിടെയിലും അത് വിജയം വരെ തുടരണം’ ബെഞ്ചമിന് നെതന്യാഹു പറഞ്ഞു. ഇതിനിടെ ഇസ്രായേല് സൈന്യം അബദ്ധത്തില് കൊലപ്പെടുത്തിയ മൂന്ന് ബന്ദികളുടെ മരണത്തെയും അപലപിച്ചു. അലോണ് ഷംരിസ്, സമര് തലാല്ക്ക, യോതം ഹൈം എന്നിവരെയാണ് സൈന്യം വധിച്ചിരുന്നത്.