തിരുവനന്തപുരം . മുഖ്യമന്ത്രി പിണറായി വിജയന്റെ മകള്‍ വീണയ്ക്കെതിരെയുള്ള മാസപ്പടി വിവാദത്തിൽ കൂടുതൽ തെളിവുകൾ പുറത്തുവിടുമെന്ന് കോൺഗ്രസ് എംഎൽഎ മാത്യു കുഴൽനാടൻ. തിങ്കളാഴ്ച രാവിലെ 11 മണിക്ക് തിരുവനന്തപുരവെച്ച് നടത്തുന്ന വാർത്താ സമ്മേളനത്തിൽ വീണക്കെതിരെയുള്ള കൂടുതൽ തെളിവുകൾ കുഴൽ നാടൻ പുറത്ത് വിടുമെന്നാണ് സൂചന.
കുഴൽനാടന്റെ മാസപ്പടി പാർട്ട് 3 എന്ന ഫേസ്ബുക്ക് കുറിപ്പാണ് ഈ വിവരം നൽകുന്നത്. വീണയ്ക്കും എക്സാലോജിക്കിനുമെതിരെ വമ്പൻ വെളിപ്പെടുത്തലുമായിട്ടാണ് തിങ്കളാഴ്ച കുഴൽനാടൻ മാധ്യമങ്ങളെ കാണുക എന്നാണു വിവരം.
വീണാ വിജയന്റെ ഉടമസ്ഥതയിലുള്ള എക്‌സാലോജിക് കമ്പനിക്കെതിരായ എസ്എഫ്‌ഐഒ അന്വേഷണം രാഷ്ട്രീയ പകപോക്കലെന്ന വാദം പൊളിഞ്ഞെന്നും അന്വേഷണം മുഖ്യമന്ത്രിയിലേക്ക് എത്താനും സാധ്യതയുണ്ടെന്നും മാത്യു കുഴല്‍നാടന്‍ പറഞ്ഞിരിക്കുന്നതിനു പിറകേയാണിത്. എസ്എഫ്‌ഐഒ അന്വേഷണത്തിന് സ്റ്റേ അനുവദിക്കാത്ത കര്‍ണാടക ഹൈക്കോടതി ഉത്തരവിന് പിന്നാലെയായിരുന്നു കുഴൽനാടൻ ഇക്കാര്യം പറഞ്ഞിരുന്നത്.
