ന്യൂ ഡൽഹി. മുഖ്യമന്ത്രി പിണറായി വിജയന്റെ മകൾ ടി.വീണയുടെ കമ്പനിയായ എക്‌സാലോജിക് കമ്പനി ഉള്‍പ്പെട്ട മാസപ്പടിക്കേസ് അന്വേഷണത്തിൽ പുതിയ വഴിത്തിരിവ്. എക്സാലോജിക്കിനെതിരെ നടക്കുന്ന റജിസ്ട്രാർ ഓഫ് കമ്പനീസിന്റെ (ആർഒസി) അന്വേഷണം സീരിയസ് ഫ്രോഡ് ഇൻവെസ്റ്റിഗേഷൻ ഓഫിസിന് (എസ്എഫ്ഐഒ) ക്ക് കൈമാറി കൊണ്ട് കേന്ദ്ര സർക്കാർ ഉത്തരവായി. കോർപറേറ്റ് മന്ത്രാലയമാണ് കേസ് എസ്എഫ്ഐഒയ്ക്കു കൈമാറിയത് സംബന്ധിച്ച ഉത്തരവിറക്കിയിരിക്കുന്നത്. ഇതോടെ വീണാ വിജയന്റെ നില കൂടുതല്‍ പരുങ്ങലിലായി.
അറസ്റ്റിന് വരെ അധികാരമുള്ള അന്വേഷണ ഏജന്‍സിയാണ് എസ്എഫ്ഐഒ. കേന്ദ്ര കോര്‍പ്പറേറ്റ് മന്ത്രാലയത്തിന് കീഴിലെ ഏറ്റവും ഉയര്‍ന്ന അന്വേഷണ ഏജന്‍സിയാണിത്. ആറംഗ അന്വേഷണ സംഘത്തെയും ചുമതലപ്പെടുത്തിക്കൊണ്ടുള്ള ഉത്തരവ് ബുധനാഴ്ച പുറത്തിറക്കി.
ആറംഗ സംഘമാണ് അന്വേഷണം നടത്തുക. എട്ടുമാസത്തിനകം അന്വേഷണം പൂർത്തിയാക്കും. എക്സാലോജിക്കിന് എതിരായ എസ്എഫ്ഐഒ അന്വേഷണ പരിധിയിൽ പൊതുമേഖലാ സ്ഥാപനമായ കെഎസ്ഐഡിസിയും ഉൾപ്പെടും. എക്സാലോജിക്ക്-സിഎംആർഎൽ ഇടപാട് അന്വേഷണവും എസ്എഫ്ഐഒയുടെ പരിധിയിൽ വരും.
മകൾ ബിസിനസ് തുടങ്ങിയത് ഭാര്യ കമലയുടെ പെൻഷൻ പറ്റുമ്പോഴുള്ള തുക ഉപയോഗിച്ചാണെന്നു സാമ്പത്തിക പ്രതിസന്ധിയുമായി ബന്ധപ്പെട്ട് നടന്ന അടിയന്തരപ്രമേയ ചർച്ചക്കിടെ മുഖ്യമന്ത്രി നിയമസഭയിൽ പറഞ്ഞതിന് പിറകെയാണ് എസ്എഫ്ഐഒ അന്വേഷണത്തെപ്പറ്റിയുള്ള വിവരങ്ങൾ പുറത്തുവന്നത്. തനിക്കും കുടുംബത്തിനും എതിരെ ഉയരുന്ന ആരോപണങ്ങൾ വ്യാജമാണെന്നും ഒരു ആരോപണവും തന്നെ ഏശില്ലെന്നും മുഖ്യമന്ത്രി പറഞ്ഞിരുന്നു.
