പത്തനംതിട്ടയിലെ മൈലപ്രയില്‍ കടയ്ക്കുള്ളില്‍ വ്യാപാരിയുടെ മൃതദേഹം ദുരൂഹ സാഹചര്യത്തില്‍ മരിച്ച നിലയിൽ കണ്ടെത്തി. മൈലപ്ര പുതുവേലില്‍ വീട്ടില്‍ ജോര്‍ജ്ജ് ഉണ്ണുണ്ണി (73) ആണ് കടയ്ക്കുള്ളില്‍ മരിച്ച നിലയില്‍ കണ്ടെത്തിയിരിക്കുന്നത്. വായില്‍ തുണി തിരുകി കൈകാലുകള്‍ പ്ലാസ്റ്റിക് കയര്‍ കൊണ്ട് കെട്ടിയ നിലയിലായിരുന്നു മൃതദേഹം കണ്ടെത്തുന്നത്.
ശനിയാഴ്ച വൈകിട്ട് അഞ്ച് മണിയോടെ കടയില്‍ സാധനം വാങ്ങാനെത്തിയവരാണ് മൃതദേഹം ആദ്യം കാണുന്നത്. സംഭവത്തെ തുടര്‍ന്ന് പൊലീസ് സ്ഥലത്തെത്തി പരിശോധന നടത്തി. സംഭവം കൊലപാതകമാണെന്നാണ് പോലീസ് പറഞ്ഞിരിക്കുന്നത്. ഫോറന്‍സിക് വിദഗ്ധരുള്‍പ്പെടെ സ്ഥലത്തെത്തി കൂടുതല്‍ പരിശോധന നടത്തിയാല്‍ മാത്രമേ സംഭവത്തില്‍ കൂടുതല്‍ വ്യക്തത ലഭിക്കൂ.
മൈലപ്ര പോസ്റ്റ് ഓഫീസിനോട് ചേര്‍ന്ന രണ്ട് മുറി കടയുടെ പിന്നില്‍ കൈകാലുകള്‍ പ്ലാസ്റ്റിക് കയര്‍ കൊണ്ട് കെട്ടി വായില്‍ തുണി തിരുകിയ നിലയിലായിരുന്നു ജോര്‍ജ്ജ് ഉണ്ണുണ്ണിയുടെ മൃതദേഹം ഉണ്ടായിരുന്നത്. കടയിലെ സിസിടിവി ക്യാമറകള്‍ തകര്‍ക്കപെട്ടി ട്ടുണ്ട്. സിസിടിവി ഹാര്‍ഡ് ഡിസ്‌കും കടയില്‍ നിന്ന് നഷ്ടപ്പെട്ടിട്ടുണ്ട്. മോഷണ ശ്രമത്തിനിടെ നടന്ന കൊലപാതകമെന്ന സംശയമാണ് ഉള്ളത്.
