ഏഷ്യാനെറ്റ് ന്യൂസിന്റെ സിന്ധു സൂര്യകുമാറിനെതിരായ മുൻ സബ് ജഡ്ജ് എസ് സുദീപിൻറെ അശ്ലീല ഫേസ്‌ബുക്ക് പോസ്റ്റ് ഹൈക്കോടതി ഇടപെടലിനെ തുടർന്ന് പിൻവലിച്ചു. ഫെയ്സ്ബുക്ക് മാതൃ കമ്പനിയായ മെറ്റയെ കക്ഷിചേർത്തിരുന്ന കേസിൽ മാസങ്ങൾ നീണ്ട നിയമ പോരാട്ടത്തിനൊടുവിൽ പ്രതിയായ സുദീപിനെ കൊണ്ട് ഹൈക്കോടതി പോസ്റ്റ് നീക്കം ചെയ്യിക്കുകയായിരുന്നു.
രാജ്യത്തിനുള്ളിൽ മാത്രം പോസ്റ്റ് നീക്കിയ ഫെയ്സ്ബുക്ക് നടപടി അംഗീകരിക്കില്ലെന്ന് വ്യക്തമാക്കിയാണ് പ്രതിയെ കൊണ്ട് തന്നെ കോടതി പോസ്റ്റ് നീക്കം ചെയ്യിച്ചിരിക്കുന്നത്. കഴിഞ്ഞ ജൂലൈ മാസത്തിലാണ് ഹീനമായ ഭാഷയിലെഴുതിയ അശ്ലീല പോസ്റ്റ് ഫെയ്സ്ബുക്കിലൂടെ മുൻ സബ് ജഡ്ജ് സുദീപ് പങ്കുവെച്ചത്.
പൊലീസ് സംഭവത്തിൽ കേസെടുത്തിരുന്നെങ്കിലും ഐടി വകുപ്പിലെയടക്കം നിസാര വകുപ്പുകൾ മാത്രമാണ് ചുമത്തിയിരുന്നത്. പ്രതിയെ ചോദ്യം ചെയ്യാനോ അശ്ലീല പോസ്റ്റിട്ട ഉപകരണങ്ങൾ പിടിച്ചെടുക്കാനോ തയ്യാറായതുമില്ല. പോസ്റ്റ് നീക്കം ചെയ്യണമെന്ന ആവശ്യം പൊലീസ് സാങ്കേതികത്വം പറഞ്ഞ് ഒഴിഞ്ഞതോടെയാണ് ഏഷ്യാനെറ്റ് ന്യൂസ് എക്സിക്യൂട്ടീവ് എഡിറ്റർ സിന്ധു സൂര്യകുമാർ കഴിഞ്ഞ നവംബറിൽ ഹൈക്കോടതിയെ സമീപിക്കുന്നത്.
പോസ്റ്റ് പിൻവലിക്കാൻ കൂട്ടാക്കാതിരുന്ന എസ് സുദീപ് ഇപ്പോൾ ഹൈക്കോടതി ഇടപെടലിൽ ആറ് മാസങ്ങൾക്ക് ശേഷം പോസ്റ്റ് നീക്കം ചെയ്തിരിക്കുകയാണ്. കേസ് ഹൈക്കോടതിയിൽ എത്തിയതിൽ പിന്നെ പോസ്റ്റിന് ഫെയ്സ്ബുക്ക് മാതൃകമ്പനിയായ മെറ്റ രാജ്യത്തിനു ള്ളിൽ ലോക്ക് ചെയ്യുകയായിരുന്നു. ഇന്ത്യയിൽ മാത്രമാണ് പോസ്റ്റിന് ജിയോ ബ്ലോക്കിംഗ് മെറ്റ നൽകിയത്. ഇതോടെ വിദേശരാജ്യങ്ങളിൽ പോസ്റ്റ് ആർക്കും കാണാവുന്ന സ്ഥിതിയായിരുന്നു.
പോസ്റ്റ് എല്ലായിടത്ത് നിന്നും നീക്കം ചെയ്യണമെന്നും പ്രചരിപ്പിക്കുന്നത് തടയണമെന്നും ഹൈക്കോടതി ജഡ്ജ് മുഹമ്മദ് നിയാസ് ശക്തമായ നിലപാട് എടുക്കുകയാണ് ഉണ്ടായത്. ഇതോടെയാണ് സുദീപിന് തന്നെ പോസ്റ്റ് നീക്കം ചെയ്യാൻ നിശ്ചിത സമയം മെറ്റ അനുവദിക്കുന്നത്. മുൻ സബ് ജഡ്ജ് എഴുതിയത് ആരും ആരെക്കുറിച്ചും എഴുതാൻ പാടില്ലാത്ത ഭാഷയെന്ന് പരാമർശിച്ച ജസ്റ്റിസ് മുഹമ്മദ് നിയാസ് എല്ലാ സോഷ്യൽ മീഡിയ പ്ലാറ്റ്‌ഫോമുകളിൽ നിന്നും ഉടൻ പോസ്റ്റ് നീക്കം ചെയ്യണമെന്ന ഉത്തരവിൽ ഉറച്ച് നിൽക്കുകയായിരുന്നു. ഇതോടെയാണ് മെറ്റ കമ്പനി എസ് സുദീപിന് ഈ പോസ്റ്റിൽ ആക്സെസ് അനുവദിക്കുകയും, അശ്ലീല പോസ്റ്റ് പ്രതി തന്നെ നീക്കം ചെയ്യാൻ വഴിയൊരുങ്ങുന്നതും.
