ബെംഗളൂരു . രാമേശ്വരം കഫേ സ്‌ഫോടന പ്രതികള്‍ക്ക് നിരോധിത ഭീകര സംഘടനയായ പോപ്പുലര്‍ ഫ്രണ്ടുമായി ബന്ധമുണ്ടെന്ന് ദേശീയ അന്വേഷണ ഏജന്‍സി (NIA). പ്രതിയുടെ മുഖം വ്യക്തമായതോടെ ഇയാള്‍ക്കായി വിവിധ സ്ഥലങ്ങളില്‍ എന്‍ഐഎ സംഘം പരിശോധന നടത്തി വരുകയാണ്. പ്രതിയുടെ കൂട്ടാളികളെയും NIA തിരിച്ചറിഞ്ഞിട്ടുണ്ട്.
സ്‌ഫോടനം നടന്ന ദിവസം വൈകുന്നേരം ബെല്ലാരി ബസ്സ്റ്റാന്‍ഡിലെ സിസിടിവിയില്‍ പതിഞ്ഞ പ്രതിയുടെ തൊപ്പി ധരിക്കാത്ത ചിത്രങ്ങള്‍ എന്‍ഐഎ പുറത്തുവിട്ടിരുന്നു. അവിടെനിന്ന് ഓട്ടോയിലാണ് ഇയാള്‍ നഗരത്തിലേക്ക് എത്തുന്നത്. രണ്ടുപേരുമായി ഇയാള്‍ സംസാരിക്കുന്നതും സിസിടിവി ദൃശ്യങ്ങളില്‍ ഉണ്ട്.
ഇവര്‍ കലബുറഗി സ്വദേശികളാണ്. ബസിലാണ് ഇരുവരും ബെല്ലാരിയില്‍ നിന്ന് കലബുറഗിയിലേക്ക് യാത്ര ചെയ്യുന്നത്. അതിലൊരാള്‍ കലബുറഗിയിലെ രാംമന്ദിര്‍ സര്‍ക്കിളില്‍ ഇറങ്ങി. എന്‍ഐഎ സംഘം ബസ്സ്റ്റാന്‍ഡിലെയും റെയില്‍വേ സ്റ്റേഷനിലെയും മറ്റ് സ്ഥലങ്ങളിലെയും സിസിടിവികള്‍ പരിശോധിച്ചുവരുന്നുണ്ട്.
കലബുറഗിക്ക് സമീപം ബിദാര്‍ ജില്ലയിലെ ഹുമ്‌നാബാദ് കേന്ദ്രീകരിച്ചും എന്‍ഐഎ സംഘം തെരച്ചില്‍ നടത്തി വരുകയാണ്. തെലങ്കാന അതിര്‍ത്തിയാണ് ഈ പ്രദേശം. നിരോധിത ഭീകരസംഘടനയായ പിഎഫ്‌ഐയുടെ തെലങ്കാന മൊഡ്യൂളിലെ അംഗമായ അബ്ദുള്‍ സലീമിനെ ഇവിടെ നിന്നാണ് എന്‍ഐഎ അറസ്റ്റ് ചെയ്തിരുന്നത്. ബെംഗളൂരു സ്‌ഫോടനത്തിന്റെ രണ്ടാം ദിവസമായിരുന്നു അറസ്റ്റ് ഉണ്ടായത്. ഇയാള്‍ക്ക് സ്‌ഫോടനവുമായി ബന്ധമുണ്ടെന്നാണ് എന്‍ഐഎ സംഘത്തിന് ലഭിച്ചിട്ടുള്ള വിവരം.
