ആകാശ രഹസ്യങ്ങൾ മനുഷ്യന് എന്നും ആകാംക്ഷ ഉണ്ടാകുന്ന ഒരു കാര്യമാണ്. ഭൂമിയോട് അടുത്തുനിൽക്കുന്നത് കൊണ്ട് തന്നെ ചന്ദ്രനിൽ ഒന്ന് പോയാൽ കൊള്ളാമെന്ന് സ്വപ്‌നം കാണാത്തവരായി ആരും തന്നെ ഉണ്ടാവില്ല . അതുപോലെ തന്നെ ചാന്ദ്ര രഹസ്യങ്ങളും അറിയാൻ നമുക്ക് ഏറെ കൗതുകമാണ്. മനുഷ്യനെ ചന്ദ്രനിലേക് എത്തിക്കാനുള്ള നാസയുടെ ശ്രമം പുരോഗമിച്ചു കൊണ്ടിരിക്കുകയാണ് . ചന്ദ്രനിൽ പോവുകയെന്ന ആഗ്രഹം നീളുമെങ്കിലും നമ്മുടെ പേര് ചന്ദ്രനിൽ എത്തിക്കാൻ അവസരം ഒരുക്കിയിരിക്കുകയാണ് നാസ. നാസയുടെ ആദ്യ റോബോട്ടിക് ലൂണാർ റോവറായ വൈപ്പറിൽ (VIPER) ആണ് ലോകമെമ്പാടുമുള്ള ആളുകൾക്ക് അവരുടെ പേരുകളും അയക്കാൻ അവസരം ലഭിക്കുക. ചന്ദ്രന്റെ ദക്ഷിണ ധ്രുവം ലക്ഷ്യമാക്കിയുള്ള ആസ്ട്രോബോട്ടിക് ടെക്നോളജീസ് ഗ്രിഫിന്‍ മിഷന്‍ ഒന്നിലാണ് വൈപ്പര്‍ റോവര്‍ വിക്ഷേപിക്കുക. 2024 അവസാനത്തോടെ ഫ്ളോറിഡയിലെ കേപ്പ് കനവറല്‍ വിക്ഷേപണ കേന്ദ്രത്തില്‍ നിന്ന് സ്പേസ് എക്സ് ഫാല്‍ക്കണ്‍ ഹെവി റോക്കറ്റിലാവും വിക്ഷേപണം. ചന്ദ്രനിലെ ജലസാന്നിധ്യവും പരിസ്ഥിതിയും പഠിക്കുകയാണ് പ്രധാന ലക്ഷ്യം.ആര്‍ട്ടെമിസ് പദ്ധതിയുടെ ഭാഗമായി ചന്ദ്രന്റെ ദക്ഷിണ ധ്രുവത്തിലേക്ക് മനുഷ്യരെ അയക്കാന്‍ നാസയ്ക്ക് പദ്ധതിയുള്ളതിനാല്‍ പരമാവധി വിവരശേഖരണത്തിനുള്ള ശ്രമമാണ് ഈ ദൗത്യം. ചന്ദ്രന്റെ ദക്ഷിണ ധ്രുവം ദീര്‍ഘകാല മനുഷ്യവാസത്തിന് അനുയോജ്യമാണെന്നാണ് കണക്കാക്കുന്നത്. നമ്മുടെ പേരുകൾ ചന്ദ്രനിലേക്ക് അയക്കുന്നതിനായി വൈപ്പർ ലിങ്ക് സന്ദർശിച്ച് നിങ്ങൾക്ക് ബോർഡിങ് പാസ് എടുക്കാം. നിങ്ങളുടെ പേര് രേഖപ്പെടുത്തിയിട്ടുള്ള ഈ പാസ് ഡൗൺലോഡ് ചെയ്യാനുമാവും. മാർച്ച് 15 വരെയാണ് ഇതിന് സമയം നൽകിയിരിക്കുന്നത്. ഇങ്ങനെ ശേഖരിക്കുന്ന പേരുകൾ പേടകത്തിൽ അപ് ലോഡ് ചെയ്ത് ചന്ദ്രനിലേക്ക് അയക്കും. ഇങ്ങനെ ചന്ദ്രനിലേക് അയക്കുന്ന പേടകത്തില്‍ ഓരോരുത്തരുടെ പേരു കൂടി അയക്കാൻ ഉള്ള സംവിധാനം ആദ്യമായി ഒരുക്കിയിരിക്കുകയാണ് യുഎസ് ബഹിരാകാശ ഏജൻസിയായ നാസ.
