കോടതി നിര്ദേശപ്രകാരം മോട്ടോര് വാഹന വകുപ്പ് വിട്ടു നൽകിയ റോബിൻ ബസ് ചൊവ്വാഴ്ച മുതൽ സർവീസ് ആരംഭിക്കും. അതേസമയം, നിയമം ലംഘനം കണ്ടാല് കര്ശന നടപടി ഉണ്ടാകുമെന്ന് എംവിഡി ഉദ്യോഗസ്ഥര് വ്യക്തമാക്കിയിട്ടുണ്ട്. ഒരു മാസത്തെ ഇടവേളയ്ക്ക് ശേഷം ഞായറാഴ്ചയാണ് റോബിന് ബസ് ഉടമയ്ക്ക് മോട്ടോര് വാഹന വകുപ്പ് വിട്ടു നൽകുന്നത്.
കഴിഞ്ഞ മാസം 24ന് പുലര്ച്ചെയാണ് റോബിന് ബസ് പിടിച്ചെടുക്കുന്നത്. ബസ് വിട്ടുകൊടുക്കാന് ശനിയാഴ്ച പത്തനംതിട്ട ജുഡീഷ്യല് മജിസ്ട്രേറ്റ് കോടതി ഉത്തരവിടുകയായിരുന്നു. തുടര്ന്ന് ഉടമ ഇന്നലെ പൊലീസിനെ സമീപിച്ചെങ്കിലും മോട്ടോര് വാഹന വകുപ്പ് ബസ് വിട്ടുകൊടുത്തിരുന്നില്ല. കോടതി നിര്ദേശം പരിഗണിച്ച് ഞായറാഴ്ചയാണ് ബസ് വിട്ടു കൊടുക്കുന്നത്. നിലവിലെ നിയമപ്രകാരം മാത്രം ബസിന് സര്വീസ് നടത്താമെന്നും അല്ലാത്തപക്ഷം നടപടി നേരിടേണ്ടി വരുമെന്നും മോട്ടോര് വാഹന വകുപ്പ് അറിയിച്ചിട്ടുണ്ട്.