ഇന്ത്യന്‍ സമ്പത്ത് വ്യവസ്ഥയില്‍ കുതിപ്പ്; ജിഎസ്ടി വരുമാനത്തില്‍ റെക്കോര്‍ഡ് വര്‍ധനവ്.

കഴിഞ്ഞ വര്‍ഷം ഡിസംബറില്‍ ഉണ്ടായ ജിഎസ്ടി വരുമാനത്തേക്കാള്‍ അധികമാണ് ഇത്തവണത്തെ കണക്ക്. കഴിഞ്ഞ വര്‍ഷത്തേക്കാള്‍ 12 ശതമാനം അധികമാണ് ഇത്തവണത്തെ ജിഎസ്ടി നരിമാനത്തില്‍ ഉണ്ടായിരിക്കുന്നതെന്ന് ധനമന്ത്രാലയം പുറത്തുവിട്ട കണക്കുകളില്‍ വ്യക്തമാക്കുന്നത്.

നടപ്പ് സാമ്പത്തിക വര്‍ഷത്തില്‍ തുടര്‍ച്ചയായി ഇത് മൂന്നാമത്തെ മാസമാണ് ജിഎസ്ടിയില്‍ നിന്നുള്ള വരുമാനം ഒരു ലക്ഷം കോടിക്ക് മുകളിലേക്ക് എത്തി നില്‍ക്കുന്നത്. 2019 ഏപ്രിലിലാണ് അവസാനമായി ജിഎസ്ടിയില്‍ നിന്ന് ഏറ്റവും കൂടുതല്‍ വരുമാനം ലഭിച്ചത്. 1,13,866 കോടി രൂപയായിരുന്നു 2019 ഏപ്രിലില്‍ ലഭിച്ചതെങ്കില്‍ ഇത്തവണ അത് 1,15,174 കോടി രൂപയായി ഉയര്‍ന്നിരിക്കുകയാണ്.

പുതിയ നികുതി സമ്പ്രദായം നിലവില്‍ വന്നശേഷം ആദ്യമായാണ് വരുമാനം 1,15,174 കോടി രൂപയായി ഉയര്‍ന്നിരിക്കുന്നത്. ജിഎസ്ടിയില്‍ നിന്നുള്ള വരുമാന വര്‍ധനവ് രാജ്യത്തിന് ഗുണം ചെയ്തിരിക്കുകയാണ്. ഇന്ത്യന്‍ സമ്പദ്ഘടന അതിവേഗ തിരിച്ചുവരവ് നടത്തുകയാണെന്നാണ് നിരീക്ഷകരുടെ അഭിപ്രായം.

2020 ഡിസംബര്‍ മാസത്തില്‍ സമാഹരിച്ച മൊത്തം ജിഎസ്ടി വരുമാനം 1,15,174 കോടി രൂപയാണ്. സിജിഎസ്ടി 21,365 കോടി രൂപയാണ്. എസ്ജിഎസ്ടി 27,804 കോടി രൂപയും ഐജിഎസ്ടി 57,426 കോടി രൂപയും ലഭിച്ചിട്ടുണ്ട്. 8,579 കോടി രൂപയാണ് സെസ് ഇനത്തില്‍ സര്‍ക്കാരിന് ലഭിച്ചിട്ടുള്ളത്.

രാജ്യത്ത് കൊറോണ വൈറസ് വ്യാപനത്തിനു ശേഷം ഇന്ത്യന്‍ സമ്പത്ത് വ്യവസ്ഥയില്‍ വന്‍ കുതിച്ചുകയറ്റമാണ് ഉണ്ടായിരിക്കുന്നത് എന്നാണ് കണക്കുകള്‍ സൂചിപ്പിരക്കുന്നത്.

Summary: Growth in Indian economy; Record increase in GST revenue.