കൊച്ചി . സർവകലാശാലാ വിദ്യാർത്ഥിയായിരുന്ന സിദ്ധാർത്ഥന്റെ മരണത്തെ തുടർന്ന് പൂക്കോട് വെറ്ററിനറി സർവകലാശാലാ വൈസ് ചാൻസലറെ സസ്പെൻഡ് ചെയ്ത ഗവർണറുടെ നടപടി ശരിവെച്ച് ഹൈക്കോടതി. സർവകലാശാലയിലെ വിദ്യാർഥിയായിരുന്ന ജെ.എസ്. സിദ്ധാർഥിന്റെ മരണത്തെ തുടർന്ന് വൈസ് ചാൻസലർ ഡോ. എം.ആർ. ശശീന്ദ്രനാഥിനെ ചാൻസലർ കൂടിയായ ഗവർണർ ആരിഫ് മുഹമ്മദ് ഖാൻ സസ്പെൻഡ് ചെയ്ത നടപടിയാണ് ഹൈക്കോടതി ശരിയാണെന്നു പറഞ്ഞിരിക്കുന്നത്.
വി.സി യെ സസ്പെൻഡ് ചെയ്യാനുള്ള ഗവർണർക്കുള്ള അധികാരപരിധി ചോദ്യം ചെയ്തുകൊണ്ടായിരുന്നു ഹർജി പോലും ഫയൽ ചെയ്തിരുന്നത്. ഹർജിയിൽ സ്റ്റേ അനുവദിക്കാൻ വിസമ്മതിച്ച കോടതി വിശദമായ വാദങ്ങൾക്ക് ശേഷം വിധി പ്രഖ്യാപിക്കുകയാണ് ഉണ്ടായത്. ഗവർണറുടെ സസ്പെൻഷൻ ഉത്തരവ് നിയമപരമായി ചോദ്യം ചെയ്യില്ലെന്ന് ശശീന്ദ്രനാഥ് ആദ്യം മാധ്യമങ്ങളോട് പറഞ്ഞിരുന്നെങ്കിലും, സര്‍ക്കാരിന്റെ സമ്മർദത്തിന് വഴങ്ങി ശശീന്ദ്രനാഥ് ഗവർണറുടെ നടപടി ചോദ്യംചെയ്ത് ഹൈക്കോടതിയിൽ ഹര്‍ജി ഫയൽ ചെയ്യുകയാണ് ഉണ്ടായത്.
ഈ ഹർജിയാണ് വാദത്തിനുശേഷം തള്ളിക്കൊണ്ട് ഹൈക്കോടതി ഉത്തരവിട്ടത്. ഡോ. കെ.എസ്. അനിലിനാണ് വൈസ് ചാൻസലറുടെ ചുമതല ഗവർണർ ഇപ്പോൾ നൽകിയിട്ടുള്ളത്.
