ഒരു നൂറ്റാണ്ടിലേറെയായി പ്രകാശം പരത്തുന്ന ബൾബ്. അതെ, കേട്ടാൽ ആരും വിശ്വസിക്കാൻ മടിക്കും. യുഎസ് കാലിഫോർണിയയിലെ ലിവർമോർ ഫയർ ഡിപ്പാർട്ട്മെന്റ് നമ്പർ 6-ലാണ് ഒരു പഴയ കാർബൺ ഫിലമെന്റ് ലൈറ്റ് ബൾബിനു ഒരു നൂറ്റാണ്ടിന്റെ അണയാത്ത കഥ പറയാനുള്ളത്. 1901 മുതൽ ഇന്നുവരെ തുടർച്ചായി പ്രകാശം പരത്തുകയാണ് ഈ ബൾബ്. ഗിന്നസ് വേൾഡ് റെക്കോർഡ്‌സ് ഈ ബൾബിന് ഏറ്റവും കൂടുതൽ കാലം പ്രകാശിച്ച ബൾബ് എന്ന പേരും നൽകി കഴിഞ്ഞിട്ടുണ്ട്. നമ്മുടെയെല്ലാം വീടുകളിലും ജോലി ചെയ്യുന്ന സ്‌ഥാപനങ്ങളിലുമൊക്കെ ഇലക്‌ട്രിക്‌ ബൾബുകൾ ഉപയോഗിക്കാറുണ്ട്. എന്നാൽ ഇവയുടെ ആയുസ്സ് ഒരു 3 മാസത്തിന് മുകളിൽ കിട്ടാൻ വലിയ ബുദ്ധിമുട്ടാണ്. എന്നാൽ, ഒരു നൂറ്റാണ്ടിലേറെ കാലമായി തുടർച്ചയായി പ്രകാശം പരത്തുന്ന കാലിഫോർണിയയിലെ ബൾബ് എല്ലാവർക്കും കൗതുകം നിറഞ്ഞതാണ്. 1899-1900 കാലഘട്ടത്തിൽ ഒഹായോയിലെ ഷെൽബിയിലെ ഷെൽബി ഇലക്‌ട്രിക്‌ കമ്പനിയാണ് ബൾബ് നിർമിച്ചത്. 1901ൽ ലിവർമോർ പവർ ആൻഡ് വാട്ടർ കമ്പനിയുടെ ഉടമയായ ഡെന്നിസ് ബെർണൽ ഇത് ലിവർമോർ ഫയർ ഡിപ്പാർട്ട്മെന്റിന് സംഭാവന ചെയ്‌തു. 1976 വരെ എൽ സ്‌ട്രീറ്റിലെ പവർ സ്‌റ്റേഷനിലാണ് ബൾബ് പ്രവർത്തിപ്പിച്ചിരുന്നത്. ഇന്നും സന്ദർശകർക്ക് ലിവർമോർ ഫയർ ഡിപ്പാർട്ട്മെന്റ് നമ്പർ 6ൽ എത്തിയാൽ ഇപ്പോഴും തെളിഞ്ഞു നിൽക്കുന്ന ഈ ബൾബ് കാണാം. എൽ സ്‌ട്രീറ്റ്‌ ഫയർ സ്‌റ്റേഷനിൽ നിന്ന് ലിവർമോർ ഫയർ ഡിപ്പാർട്ട്മെന്റിലേക്ക് മാറ്റിയപ്പോൾ 22 മിനിറ്റ് നേരത്തേക്ക് അത് സ്വിച്ച് ഓഫ് ചെയ്‌തതൊഴിച്ചാൽ ഇക്കാലമത്രയും ഈ ബൾബ് പ്രകാശിച്ചു കൊണ്ടിരിക്കുകയാണ്.
