കടത്തിൽ മുങ്ങി സംസ്ഥാനത്തെ ആരോഗ്യവകുപ്പ്. 949 കോടി രൂപയിലധികം പണം കുടിശികയായി വകുപ്പ് നൽകാനുണ്ട്. സൗജന്യ മരുന്ന് വിതരണം, വിവിധ ചികിൽസാ പദ്ധതികൾ എന്നിവയെ ഇത് കാര്യമായി ബാധിച്ച് തുടങ്ങി.
കാരുണ്യ ആരോഗ്യ സുരക്ഷാ പദ്ധതിയിലെ കുടിശിക 867 കോടി 83 ലക്ഷത്തി 23,249. കാരുണ്യ ബനവലന്‍റ് ഫണ്ട് 171 കോടി 31ലക്ഷത്തി 46385, ആരോഗ്യ കിരണം 49ലക്ഷത്തി 85,826 , ആകെ തൊള്ളായിരത്തി നാൽപത്തി ഒമ്പത് കോടി 64ലക്ഷത്തി 55469 രൂപ. ഇത് സ‍ർക്കാരിന്‍റെ തന്നെ കണക്കാണ്. മെഡിക്കൽ സർവീസസ് കോർപറേഷൻ വഴി മരുന്ന് വാങ്ങിയത്, കാരുണ്യയിൽ നിന്ന് സ‍ർക്കാർ മേഖലയിലേക്ക് മരുന്നെടുത്തത് തുടങ്ങിയതിന്റെ കണക്കുകൾ നോക്കിയാൽ 200 കോടിക്കുമേലെ കുടിശിക വരും. ധന വകുപ്പ് കനിയാതെ ഒരു രൂപ പോലും കൊടുക്കാനാകില്ലെന്നിരിക്കെ പല പദ്ധതികളും എങ്ങനെ മുന്നോട്ട് കൊണ്ടുപോകുമെന്ന ആശങ്ക ആരോഗ്യ വകുപ്പിനുണ്ട്. സൗജന്യ മരുന്ന് വിതരണത്തിൽ പല മരുന്നും കിട്ടാനില്ലെന്ന പരാതി വ്യാപകമാണ്. മാത്രവുമല്ല കാരുണ്യ പദ്ധതി പ്രകാരം ചികിൽസ നൽകിയ സ്വകാര്യ ആശുപത്രികൾക്ക് നൽകാനുള്ള കുടിശിക ഈ മാസം അവസാനത്തോടെ നൽകാമെന്നാണ് നൽകിയിരിക്കുന്ന ഉറപ്പ്. ഈ തുക 300കോടിയിലധികം വരും. ഹൃദയശസ്ത്രക്രിയാ ഇംപ്ലാന്‍റുകൾ നൽകുന്ന ഏജൻസികളുടെ കുടിശിക ഈ മാസം 15 ഓടെ നൽകാമെന്നും ഉറപ്പ് നൽകിയിട്ടുണ്ടെങ്കിലും പണം എങ്ങനെ കണ്ടെത്തുമെന്ന് യാതൊരു വ്യക്തതയുമില്ല.
