പ്രതിപക്ഷം ദുര്‍ബലമാണെന്ന പാര്‍ട്ടിയിലെ ഒരു വിഭാഗത്തിന്റെ വിമര്‍ശനത്തെ തള്ളി പ്രതിപക്ഷ നേതാവ് വിഡി സതീശന്‍. സര്‍ക്കാരിനോട് മൃദുസമീപനമില്ല. നടുത്തളത്തിലിറങ്ങി മുദ്രാവാക്യം വിളിക്കുന്നതും ബഹളം വെക്കുന്നതുമല്ല നിയമസഭാ പ്രവര്‍ത്തനമെന്നും വിഡി സതീശന്‍ പറയുന്നു. സര്‍ക്കാരിനോട് ഒരിക്കലും ഞങ്ങള്‍ മൃദുസമീപനം എടുത്തിട്ടില്ല. സര്‍ക്കാരിന്റെ ഹണിമ്യൂണ്‍ പിരീയഡ് കഴിയുന്നതിന് മുന്‍പേ ഞങ്ങള്‍ സര്‍ക്കാരിനെ പ്രതികൂട്ടിലാക്കി. പ്രതിപക്ഷം കുറച്ചുകൂടി നന്നാകണം എന്നാഗ്രഹിക്കുന്നവരായിരിക്കും അങ്ങനെയൊരു അഭിപ്രായം പറഞ്ഞത്. എന്നോട് ആരും അങ്ങനെയൊരു അഭിപ്രായം പറഞ്ഞിട്ടില്ലെന്നും വിഡി സതീശന്‍ മാധ്യമങ്ങളോട് പറഞ്ഞു.
എപ്പോഴും നിയമസഭയില്‍ ബഹളം വെക്കലല്ല പ്രതിപക്ഷത്തിന്റെ ജോലിയെന്നും അദ്ദേഹം പറയുന്നു. തെറ്റ് ചൂണ്ടിക്കാട്ടി തന്നെ മുന്നോട്ട് പോകാനാണ് തീരുമാനം. ശിവന്‍കുട്ടിക്കെതിരെ കോടതി വിധി വന്നപ്പോള്‍ വലിയൊരു പ്രക്ഷോഭം ഞങ്ങള്‍ ഉണ്ടാക്കാതിരുന്നത് ശിവന്‍കുട്ടിയെ പോലെയല്ല പ്രതിപക്ഷം എന്നുള്ളത് കൊണ്ടാണെന്നും അദ്ദേഹം പറയുകയുണ്ടായി. അത്തരത്തില്‍ ക്രീയാത്മകമായാണ് യുഡിഎഫ് മുന്നോട്ട് പോകുന്നത്. ഞങ്ങള്‍ ഒരിക്കലും ഒരു സാമ്പ്രദായിക രീതിയില്‍ പ്രവര്‍ത്തിക്കില്ലെന്നും അദ്ദേഹം വ്യക്തമാക്കി.
അതേസമയം, മുസ്ലിം ലീഗിലെ പ്രശ്‌നങ്ങള്‍ പാര്‍ട്ടിക്കുള്ളില്‍ തന്നെ പരിഹരിക്കുമെന്ന് വിഡി സതീശന്‍. കേഡര്‍ സ്വഭാവമുള്ള പാര്‍ട്ടിയാണ് ലീഗ്, അതുകൊണ്ടുതന്നെ കോണ്‍ഗ്രസ് ഇടപെടില്ലെന്നും വിഡി സതീശന്‍ പറഞ്ഞു.
