ഇന്ധനവില വര്ധനയ്ക്കെതിരെ ഇടപ്പള്ളി-വൈറ്റില ബൈപാസില് കോണ്ഗ്രസിന്റെ വന് പ്രതിഷേധം. എറണാകുളം ജില്ലാ കോണ്ഗ്രസ് കമ്മിറ്റിയാണ് വാഹനം തടഞ്ഞുവെച്ച് മണിക്കൂറുകളോളം പ്രതിഷേധിച്ചത്. വലിയ ഗതാഗത കുരുക്കാണ് അനുഭപ്പെട്ടത്. ഗതാഗതകുരുക്കില് അകപ്പെട്ട നടന് ജോജു ജോര്ജ്ജ് പ്രതിഷേധക്കാര്ക്കെതിരെ പൊട്ടിത്തെറിച്ചു. പിന്നീട് സംഘര്ഷാവസ്ഥയാണ് സംഭവ സ്ഥലത്തുണ്ടായത്. ജോജു ജോര്ജ്ജിന്റെ കാറിന്റെ ചില്ലുകള് പ്രതിഷേധക്കാര് തല്ലിപൊട്ടിച്ചെന്നാണ് പറയുന്നത്. കോണ്ഗ്രസ് പ്രവര്ത്തകര്ക്കെതിരെ മോശമായി പ്രതികരിച്ച ജോജു മാപ്പ് പറഞ്ഞിട്ട് പോയാല് മതിയെന്ന് പറഞ്ഞ് പ്രതിഷേധക്കാര് കാര് തടഞ്ഞുവെക്കുകയായിരുന്നു. കാറില് നിന്ന് പുറത്തിറങ്ങാതെ മണിക്കൂരോളം ജോജു അകപ്പെട്ടു. തുടര്ന്ന് പോലീസെത്തിയാണ് പ്രതിഷേധക്കാര്ക്കിടയില് നിന്ന് ജോജുവിന്റെ രക്ഷപ്പെടുത്തിയത്.
പ്രതിഷേധത്തിനിടയില് ഉന്തും തള്ളും ഉണ്ടായി. ജോജുവിന്റെ കൈക്ക് പരിക്കേറ്റെന്നും പറയുന്നുണ്ട്. പൊതുജനങ്ങളെ ബുദ്ധിമുട്ടിക്കുന്ന സമരപരിപാടി ഒരു രാഷ്ട്രീയ പാര്ട്ടിയും നടത്തരുതെന്ന് പറഞ്ഞായിരുന്നു റോഡ് തടഞ്ഞ് കോണ്ഗ്രസ് നടത്തിയ സമരത്തെ ജോജു ചോദ്യം ചെയ്തത്. താനൊരു രാഷ്ട്രീയക്കാരനല്ലെന്നും തനിക്കൊരാളോടും വൈരാഗ്യമില്ലെന്നും, കോണ്ഗ്രസ്സുകാരെ നാണം കെടുത്താന് പാര്ട്ടിയുടെ പേരും പറഞ്ഞ് കുറച്ച് പേര് ഇറങ്ങിയിരിക്കുകയാണെന്നും ജോജു ആരോപിച്ചു.
ഇങ്ങനെയാണോ സമരം ചെയ്യേണ്ടതെന്നും. നമ്മുടെ വീട്ടിലാണെങ്കില് ഇത്തരത്തില് ചെയ്യുമോ എന്നും ജോജു ചോദിച്ചു. എന്നാല് സമരത്തിനെതിരെ ശബ്ദമുയര്ത്തിയ ജോജുവിനെ കോണ്ഗ്രസ് പ്രവര്ത്തകര് ആക്രമിക്കുകയായിരുന്നു. ജോജു ജോര്ജ് മദ്യപിച്ചിട്ടുണ്ടെന്നും വനിതയോട് മോശമായി പെരുമാറി എന്നും കോണ്ഗ്രസ് പ്രവര്ത്തകര് ആരോപിക്കുന്നു.കോണ്ഗ്രസ് പ്രവര്ത്തകരുമായി ജോജു വാക്കേറ്റമുണ്ടായി. ഷോ കാണിക്കാന് വേണ്ടി ഇറങ്ങിയതല്ലെന്നും സാധാരണക്കാരായ നിരവധിയാളുകള് റോഡില് കുടുങ്ങിക്കിടക്കുകയാണെന്നും ജോജു ജോര്ജ് പറഞ്ഞു. സമരം തകര്ക്കാന് ആരുടെയെങ്കിലും കൈയില് നിന്ന് പണം വാങ്ങിയോ എന്ന ചോദ്യത്തോട് ജോജു പൊട്ടിത്തെറിച്ചു. ആരുടെയും പണം വാങ്ങിയിട്ടില്ലെന്നും നന്നായി അന്തസ്സോടെ പണിയെടുത്തിട്ടാണ് പണം സമ്പാദിക്കുന്നതെന്നും ജോജു പറയുകയുണ്ടായി.