തിരുവനന്തപുരം . പുല്വാമ ഭീകരാക്രമണവുമായി ബന്ധപ്പെട്ട് പത്തനംതിട്ട എംപി ആന്റോ ആന്റണി നടത്തിയ വിവാദ പ്രസ്താവനയുമായി ബന്ധപെട്ടു ആന്റോ ആന്റണിയെ രാജ്യദ്രോഹക്കുറ്റം ചുമത്തി അറസ്റ്റ് ചെയ്യണമെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന്. ആരുടെ വോട്ടിനു വേണ്ടിയാണ് ഇത്തരം നീചമായ പ്രസ്താവന നടത്തുന്നതെന്ന് ചോദിച്ച സുരേന്ദ്രൻ, ആന്റോയുടെ പാക് അനുകൂല നിലപാടിന് പത്തനംതിട്ടയിലെ ദേശസ്നേഹികള് വോട്ടിലൂടെ മറുപടി നല്കുമെന്ന് കൂടി പറഞ്ഞു.
പാകിസ്ഥാന് പുല്വാമ ഭീകരാക്രമണത്തില് പങ്കില്ലെന്നാണ് ആന്റോ പറഞ്ഞത്. ഇത് രാജ്യത്തെ അപമാനിക്കലാണ്. ആരുടെ വോട്ട് ലക്ഷ്യമിട്ടാണ് ഇത്തരമൊരു പ്രസ്താവന നടത്തിയതെന്ന് ആന്റോ പറയണം. ഇന്ത്യന് സൈന്യം ആവര്ത്തിച്ച് വ്യക്തമാക്കിയ വിഷയത്തിലാണ് നാല് വോട്ടിന് വേണ്ടി പത്തനംതിട്ട എംപിയുടെ വക്രീകരണം ഉണ്ടായിരിക്കുന്നത്. രാജ്യത്തിനായി വീരമൃത്യുവരിച്ച സൈനികരെ അവഹേളിക്കുകയും സൈന്യത്തിന്റെ ആത്മവീര്യത്തെ ചോദ്യം ചെയ്യുകയുമാണ് എം പി ചെയ്തിരിക്കുന്നത് – സുരേന്ദ്രന് പറഞ്ഞു.
42 ജവാന്മാരുടെ ജീവന് ബലി കൊടുത്താണ് കഴിഞ്ഞ തെരഞ്ഞെടുപ്പില് ബിജെപി വിജയിച്ചതെന്നാണ് ആന്റോ ആന്റണി ആരോപണം ഉന്നയിച്ചത്. പുല്വാമ ആക്രമണത്തില് പാകിസ്ഥാന് എന്ത് പങ്കെന്നായിരുന്നു ആന്റോ ആന്റണി ചോദിച്ചത്. തെരഞ്ഞെടുപ്പ് ജയിക്കാന് ബിജെപി എന്തും ചെയ്യും എന്നതിന്റെ ഉദാഹരണമാണ് പുല്വാമ ആക്രമണമെന്നും ആന്റോ ആന്റണി കുറ്റപ്പെടുത്തിയിരുന്നു.