കൊല്ക്കത്ത . പശ്ചിമബംഗാള് സ്കൂള് സര്വീസസ് കമ്മിഷന് (എസ്.എസ്.സി.) നിയമന കുംഭകോണത്തില് മമത സര്ക്കാരിന് കനത്ത തിരിച്ചടി. സര്ക്കാര് സ്പോണ്സേഡ്, എയ്ഡഡ് സ്കൂളുകളിലെ 2016 ലെ മുഴുവന് നിയമന നടപടികളും റദ്ദാക്കിയ കൊല്ക്കത്ത ഹൈക്കോടതി, സി.ബി.ഐ അന്വേഷണത്തിനു ഉത്തരവ് ഇടുകയും ചെയ്തു. ജസ്റ്റിസുമാരായ ദെബാങ്സു ബസാക്, എം.ഡി. ഷബ്ബാര് റാഷിദി എന്നിവരടങ്ങുന്ന ബെഞ്ചാണ് നിയമനങ്ങള് അസാധുവാക്കി വിവാദ നിയമന കുംഭകോണത്തില് സി.ബി.ഐ അന്വേഷണത്തിനു ഉത്തരവ് നല്കിയിരിക്കുന്നത്.
സി.ബി.ഐ റിപ്പോര്ട്ട് മൂന്ന് മാസത്തിനുള്ളില് സമര്പ്പിക്കണ മെന്നാണ് ഹൈക്കോടതിയുടെ ഉത്തരവിൽ പറഞ്ഞിട്ടുള്ളത്. ഇതോടെ 25,573 അധ്യപക – അനധ്യാപക തസ്കികകളിലേക്ക് മമത സർക്കാർ നടത്തിയ നിയമനങ്ങള് പൂർണമായും റദ്ദാക്കപ്പെട്ടു. നിയമനം കിട്ടിയവര് ഇതുവരെ വാങ്ങിയ ശമ്പളവും അതിന്റെ 12 ശതമാനം പലിശയും ചേര്ത്ത് നാലാഴ്ചയ്ക്കകം മടക്കി നല്കണമെന്നും കൊല്ക്കത്ത ഹൈക്കോടതി ഉത്തരവിട്ടുണ്ട്. അതേസമയം കാന്സര് ബാധിതനായ സോമ ദാസ് എന്നയാള്ക്ക് മാത്രം കോടതി ഇളവു നല്കി.
2016-ല് നടന്ന എസ്.എസ്.സി നിയമന പരീക്ഷയില് 23 ലക്ഷം പേരാണ് 24,640 തസ്തികകളിലേക്കായി പരീക്ഷ എഴുതിയിരുന്നത്. ഇതില് 25,753 പേര്ക്ക് നിയമന ഉത്തരവ് ലഭിച്ചുവെന്ന് പരാതിക്കാരുടെ അഭിഭാഷകനായ ഫിര്ദൗസ് ഷമീം കോടതിയില് ചൂണ്ടിക്കാട്ടി. ഉത്തരവ് സ്റ്റേ ചെയ്യാനുള്ള അപേക്ഷയും കൊല്ക്കത്ത ഹൈക്കോടതി തള്ളിയിട്ടുണ്ട്. 15 ദിവസത്തിനുള്ളില്പുതിയ നിയമന നടപടികള് ആരംഭിക്കാനും നിര്ദേശിച്ച കേസില്, ഡിവിഷന് ബെഞ്ചിനെ നിയമിക്കാന് 2023 നവംബര് ഒമ്പതിനാണ് സുപ്രീം കോടതി കെല്ക്കത്ത ഹൈക്കോടതി ചീഫ് ജസ്റ്റിസിന് നിര്ദേശം നല്കുന്നത്.