തിരുവനന്തപുരം: പി ശശിയെ മുഖ്യമന്ത്രിയുടെ പൊളിറ്റിക്കല് സെക്രട്ടറി ആയി നിയമിക്കുന്നതിനെതിരേ പി ജയരാജന് ഉയര്ത്തിയ വിമര്ശനത്തില് പ്രതികരിച്ച് എല്.ഡി.എഫ് കണ്വീനര് ഇ.പി ജയരാജന്. പി.ശശിയുടെ നിയമനം പാര്ട്ടി സംസ്ഥാന കമ്മിറ്റി ഏകകണ്ഠമായാണ് അംഗീകരിച്ചത്. മറിച്ചുള്ള റിപ്പോര്ട്ടുകളെല്ലാം വസ്തുതാവിരുദ്ധമാണ്. പലവിധ അഭിപ്രായങ്ങളുണ്ടാകാം,അത് സ്വാഭാവികമാണ്. പക്ഷെ തീരുമാനം ഏകകണ്ഠമായിരുന്നുവെന്ന് അദ്ദേഹം വ്യക്തമാക്കി.
ചില വിഷയങ്ങളില് പാര്ട്ടി പ്രവര്ത്തകര്ക്കെതിരേ നടപടി ഉണ്ടായേക്കാം. ഒരിക്കല് പുറത്താക്കപ്പെട്ടാല് അയാള് ആജീവനാന്തം പുറത്താക്കപ്പെടണ്ടേ ആളാണെന്നത് തെറ്റായ ധാരണയാണ്.പി ശശിക്ക് യാതൊരുവിധ അയോഗ്യതയുമില്ല. തെറ്റ് പറ്റാത്തവരായി ആരുമില്ല മനുഷ്യരായി. പൊതുപ്രവര്ത്തനത്തിനിടെ ചില തെറ്റുകള് സംഭവിച്ചേക്കാം. അത് പരിഹരിക്കാനും ഇനി ആവര്ത്തിക്കാതിരിക്കാനുമാണ് പാര്ട്ടി നടപടി സ്വീകരിക്കുന്നതെന്നും അദ്ദേഹം പറഞ്ഞു.
പി. ശശിയെ മുഖ്യമന്ത്രിയുടെ പൊളിറ്റിക്കല് സെക്രട്ടറിയായി നിയമിക്കുന്നതിനെതിരെ സംസ്ഥാന സമിതി യോഗത്തില് പി. ജയരാജന് രംഗത്തെത്തിയിരുന്നു. പി. ശശിക്ക് നിയമനം നല്കുന്നത് എന്തിന്റെ പേരിലാണെന്നതു വിശദീകരിക്കണം എന്നായിരുന്നു ജയരാജന് ആവശ്യപ്പെട്ടത്. സൂക്ഷ്മതയില്ലാത്ത തീരുമാനത്തിന്റെ പേരില് വീഴ്ചകള് ആവര്ത്തിക്കാന് സാധ്യതയുണ്ടെന്നും സംസ്ഥാനസമിതി യോഗത്തില് അദ്ദേഹം തുറന്നടിച്ചതായാണ് പുറത്തപവരുന്ന റിപ്പോര്ട്ടുകള്.