നടി ആക്രമിക്കപ്പെട്ട കേസില്‍ വാദങ്ങള്‍ അന്തിമ ഘട്ടത്തില്‍ നില്‍ക്കുമ്പോള്‍ എന്തുകൊണ്ട് സംവിധായകന്‍ ഈ നിര്‍ണായക വിവരങ്ങള്‍ ആദ്യം പുറത്തുവിട്ടില്ലെന്ന സംശയാണ് ഇപ്പോള്‍ ഉയര്‍ന്നുവരുന്നത്. നിങ്ങള്‍ എന്തുകൊണ്ട് ഈ വിവരം അന്വേഷണ സംഘത്തോട് ആദ്യം പറഞ്ഞില്ലെന്നുള്ള മാധ്യമപ്രവര്‍ത്തകന്റെ ചോദ്യത്തോട് സംവിധായകന്‍ ബാലചന്ദ്രകുമാര്‍ പറയുന്നതിങ്ങനെ. കേരളത്തില്‍ ഒരു കന്യാസ്ത്രീ പീഡിപ്പിക്കപ്പെട്ടിട്ട് ആറ് വര്‍ഷം കഴിഞ്ഞപ്പോഴാണ് അവര്‍ അത് വെളിപ്പെടുത്തിയത്. എന്നിട്ടും ആ കേസ് അന്വേഷണം മുന്നോട്ട് പോയില്ലേ. ഇതെല്ലാം ഓരോ സാഹചര്യം മൂലം സംഭവിച്ചുപോയതാണെന്ന് ബാലചന്ദ്രകുമാര്‍ പറയുന്നു. ഏത് സമയത്ത് ഇതെല്ലാം തുറന്നുപറയണമെന്നത് അവരുടെ മനസ്സിന്റെ കാര്യമാണെന്നും അദ്ദേഹം പറയുന്നു. 2016ല്‍ പള്‍സര്‍ സുനിയെ കണ്ട ഞാന്‍ എന്തുകൊണ്ട് 2021ല്‍ പുറത്തുപറയുന്നുവെന്ന ചോദ്യം എല്ലാവരും തന്നോട് ചോദിക്കുന്നതാണ്. സത്യത്തില്‍ ഭയം കൊണ്ടാണെന്നും ബാലചന്ദ്രകുമാര്‍ പറയുന്നു.
ഭയം മാറി ധൈര്യം വരുന്ന ഒരു സമയമുണ്ട്. അതാണ് ഉണ്ടായിരിക്കുന്നതെന്നും അദ്ദേഹം പറയുന്നു. ദിലീപിന് ഞാന്‍ വര്‍ഷങ്ങള്‍ക്കുമുന്‍പ് ഭീഷണി മെസേജ് അയച്ചുവെന്ന് പറയുന്നുണ്ട്. എന്നാല്‍ അങ്ങനെയൊരു കാര്യം ഞാന്‍ ചെയ്തിട്ടുണ്ടെങ്കില്‍ പുള്ളി എന്തുകൊണ്ട് ഒരു പരാതി കൊടുത്തില്ലെന്നും ബാലചന്ദ്രകുമാര്‍ ചോദിക്കുന്നു. ബാലചന്ദ്രകുമാറിനെ ദിലീപ് പേടിക്കുന്നുണ്ടോ? ഞാന്‍അയച്ച മെസേജ് എന്താണെന്ന് കൃത്യമായ മുഖ്യമന്ത്രിക്ക് സ്‌ക്രീന്‍ഷോട്ട് അടക്കം കൊടുത്തിട്ടുണ്ടെന്നും അദ്ദേഹം പറയുന്നു. ഞാന്‍ മെസേജ് അയച്ചു എന്നു പറയുന്ന സംഭവശേഷം അദ്ദേഹം തിരുവനന്തപുരത്തെത്തി ഒരു ഹോട്ടലില്‍ കാവലിരുന്ന് തന്നെ നിരന്തരം ഫോണില്‍ വിളിച്ചതിന്റെ എല്ലാ തെളിവുകളും മുഖ്യമന്ത്രിക്ക് നല്‍കിയിട്ടുണ്ടെന്നും ബാലചന്ദ്രകുമാര്‍ പറയുന്നു. നടി ആക്രമിക്കപ്പെട്ട ദൃശ്യം ദിലീപിന് വിഐപി കൊണ്ടുകൊടുത്തിരുന്നു. അത് കാണാന്‍ തന്നെ വിളിപ്പിച്ചിരുന്നുവെന്നും ബാലു കണ്ടില്ലേ എന്ന് ദിലീപ് പറഞ്ഞെന്നും ബാലചന്ദ്രകുമാര്‍ പറയുന്നു.
