പ്രശസ്ത തമിഴ് കോമഡി നടന്‍ വിവേക് അന്തരിച്ചു. ഇന്ന് പുലര്‍ച്ചെ 4.35 ഓടെയായിരുന്നു അന്ത്യം. ഹൃദയാഘാതത്തെ തുടര്‍ന്ന് അദ്ദേഹത്തെ ആശുപത്രിയില്‍ പ്രവേശിപ്പിച്ചിരിക്കുകയായിരുന്നു. ഇന്നലെതന്നെ സ്ഥിതി അതീവ ഗുരുതരമാണെന്ന് ആശുപത്രി വൃത്തങ്ങള്‍ അറിയിച്ചിരുന്നു. ചെന്നൈയിലെ സിംസ് ആശുപത്രിയിലായിരുന്നു അന്ത്യം.
വെള്ളിയാഴ്ചയാണ് വിവേകിനെ ഹൃദയാഘാതം മൂലം ആശുപത്രിയില്‍ പ്രവേശിപ്പിച്ചത്. ഗുരുതരാവസ്ഥയിലായ നടനെ പിന്നീട് തീവ്രപരിചരണ വിഭാഗത്തില്‍ പ്രവേശിപ്പിച്ചിരുന്നു. വിവേകിന്റെ നില അതീവ ഗുരുതരാവസ്ഥയിലാണെന്ന് ചൂണ്ടിക്കാട്ടി വൈകിട്ടോടെ മെഡിക്കല്‍ ബുള്ളറ്റിന്‍ പുറത്തിറക്കി. തമിഴ് കോമഡി താരങ്ങളില്‍ ശ്രദ്ധേയനായ നടനാണ് വിവേക്. ഹരീഷ് കല്യാണ്‍ നായകനായി എത്തിയ ധാരാള പ്രഭു എന്ന ചിത്രത്തിലാണ് അവസാനമായി അഭിനയിച്ചത്.
സാമി, ശിവാജി, അന്യന്‍ തുടങ്ങി ഇരുന്നൂറിലധികം ചിത്രങ്ങളില്‍ അഭിനയിച്ചിട്ടുണ്ട്. മൂന്ന് തവണ തമിഴ്നാട് സര്‍ക്കാരിന്റെ മികച്ച ഹാസ്യനടനുള്ള പുരസ്‌കാരം നേടിയ വിവേക് 2009 ല്‍ പത്മശ്രീയും നേടി. കമല്‍ഹാസന്റെ പുറത്തിറങ്ങാനിരിക്കുന്ന ഇന്ത്യന്‍ 2ലും വിവേക് അഭിനയിക്കുന്നുണ്ടായിരുന്നു. എന്നാല്‍ അതിനിടയിലാണ് അപ്രതീക്ഷിതമായ വിടവാങ്ങല്‍.
മനതില്‍ ഉരുതി വേണ്ടും എന്ന സിനിമയിലൂടെയാണ് വിവേക് എന്ന നടനെ തമിഴ് ഉലകത്തിന് ലഭിക്കുന്നത്. പിന്നീടങ്ങോട്ട് വിവേക് എന്ന നടന്‍ തമിഴ് ചിത്രങ്ങളില്‍ നിറഞ്ഞുനില്‍ക്കുകയായിരുന്നു.
