മതവിദ്വേഷ പ്രസംഗം നടത്തിയ പി.സി ജോര്ജിനെ അറസ്റ്റ് ചെയ്ത പോലീസ് നടപടിയെ പിന്തുണച്ച് മുന് മന്ത്രിയും എം.എല്.എയുമായ കെ ടി ജലീല്. വിദ്വേഷ പ്രസംഗം നടത്തി 24 മണിക്കൂര് കഴിയുന്നതിന് മുന്പ് പോലീസ് സ്വമേധയാ കേസെടുത്ത് പി.സി ജോര്ജിനെ അറസ്റ്റ് ചെയ്തു. ഇത് തോന്നിവാസങ്ങള് പുലമ്പുന്നവര്ക്കുള്ള മുന്നറിയിപ്പാണെന്നും കെ ടി ജലീല് പ്രതികരിച്ചു. വര്ഗീയ പ്രചരണത്തില് കേരളത്തെ ഉത്തരേന്ത്യയാക്കാനല്ല ഉത്തരേന്ത്യയെ കേരളമാക്കാനാണ് ശ്രമിക്കേണ്ടതെന്നും കെ ടി ജലീല് ഫേസ്ബുക്ക് പോസ്റ്റില് കുറിച്ചു.
ഫേസ്ബുക്ക് പോസ്റ്റിന്റെ പൂര്ണരൂപം
വിദ്വേഷ പ്രസംഗം നടത്തിയതിന്റെ വീഡിയോ വയറലായി 24 മണിക്കൂര് കഴിയുന്നതിന് മുമ്പ് മുന് യു.ഡി.എഫ് സര്ക്കാരിന്റെ കാലത്തെ ഗവ: ചീഫ് വിപ്പ് പി.സി ജോര്ജ്ജിനെ വെളുപ്പാന് കാലത്ത് താമസ സ്ഥലത്തു നിന്ന് പോലീസ് കസ്റ്റഡിയിലെടുത്തു. പോലീസ് സ്വമേധയാ എടുത്ത കേസിലാണ് നടപടി. ഇതൊരു മുന്നറിയിപ്പാണ്. ഇത്തരം തോന്നിവാസങ്ങള് പുലമ്പുന്നവര്ക്ക്.ഓരോരുത്തര്ക്കും അവനവന്റെയും അവരുടെ വിശ്വാസത്തിന്റെയും മഹത്വങ്ങള് പറയാം. അത് സഹോദര മതസ്ഥരെ അപമാനിച്ച് കൊണ്ടും ഇകഴ്ത്തിക്കൊണ്ടും ആകാതെ നോക്കാന് എല്ലാവരും ജാഗ്രത പുലര്ത്തണം.
വര്ഗീയ പ്രചരണത്തില് കേരളത്തെ ഉത്തരേന്ത്യയാക്കാനല്ല ഉത്തരേന്ത്യയെ കേരളമാക്കാനാണ് ശ്രമിക്കേണ്ടത്. എല്ലാവരില് നിന്നും നന്മയെ നമുക്ക് പകര്ത്താം. തിന്മയെ നിരാകരിക്കുകയും ചെയ്യാം.
പിണറായി വേറെ ലെവലാണ്. കേരളവും.