കൊച്ചി: യുവനടിയെ പീഡിപ്പിച്ച കേസില്‍ നടനും നിര്‍മാതാവുമായ വിജയ് ബാബുവിനെ നാട്ടിലെത്തിക്കാന്‍ പൊലീസിന്റെ നീക്കം. ഇതിനായി കേന്ദ്ര അന്വേഷണ ഏജന്‍സികളുടെ സഹായം തേടി പാസ്പോര്‍ട്ട് കണ്ടുകെട്ടാന്‍ അപേക്ഷ സമര്‍പ്പിക്കാനാണ് അന്വേഷണ ഉദ്യോഗസ്ഥരുടെ നീക്കം. എന്നാല്‍ നാട്ടിെത്തിയാല്‍ മുന്‍കൂര്‍ ജാമ്യാപേക്ഷ അവഗണിച്ച് വിമാനത്താവളത്തില്‍ വച്ചുതന്നെ അറസ്റ്റ് ചെയ്‌തേക്കും.ഇയാളുടെ ചില സുഹൃത്തുക്കളുടേയും സഹപ്രവര്‍ത്തകരുടേയും മൊഴി രേഖപ്പെടുത്തിയിട്ടുണ്ട്.
മേയ് 16നാണ് നടന്റെ മുന്‍കൂര്‍ ജാമ്യഹര്‍ജിയില്‍ ഹൈക്കോടതി വിധി പറയുക. അതേസമയം യുവനടി എറണാകുളം സൗത്ത് പോലീസ് സ്റ്റേഷനില്‍ പരാതി നല്‍കിയ ഉടന്‍ തന്നെ വിജയ് ബാബു വിവരമറിഞ്ഞെതായി സൂചനയുണ്ട്. വിവരം ചോര്‍ന്നതെന്ന് എങ്ങനെയാണെന്ന് കണ്ടെത്താനുളള അന്വേഷണം ആരംഭിച്ചു.ഈ മാസം 22 നാണ് നടി എറണാകുളം സൗത്ത് പോലീസ് സ്റ്റേഷനില്‍ പരാതി നല്‍കിയത്. അതേസമയം 24നാണ് വിജയ് ബാബു ദുബായിലേക്ക് പോയത്. പരാതി നല്‍കി രണ്ടുദിവസം കഴിഞ്ഞ് പ്രതി വിദേശത്തേക്ക് കടന്നത് തടയാന്‍ പൊലീസിന് കഴിഞ്ഞില്ല എന്നത് വിമര്‍ശനത്തിനിടയാക്കിയിട്ടുണ്ട്.
