തിരുവനന്തപുരം: ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ്(എയിംസ്) കേരളത്തില് സ്ഥാപിക്കാന് കേന്ദ്രധനമന്ത്രാലയത്തിന്റെ അനുമതി കേന്ദ്ര ആരോഗ്യമന്ത്രാലയം തേടിയ സാഹചര്യത്തില് നടപടികള് വേഗത്തിലാക്കി സംസ്ഥാനസര്ക്കാരും.കോഴിക്കോട് കിനാലൂരില് ആയിരിക്കും പദ്ധതി നടപ്പിലാക്കുക .വ്യവസായപാര്ക്കിനായി മുന്പ് റവന്യൂവകുപ്പ്, കെ.എസ്.ഐ.ഡി.സി.ക്ക് കൈമാറിയ 153.46 ഏക്കര് ഭൂമി തിരിച്ചുകൊടുക്കാന് വ്യവസായവകുപ്പ് ഉത്തരവായി. റവന്യൂവകുപ്പ് ഭൂമി ആരോഗ്യവകുപ്പിന് കൈമാറും. മെഡിക്കല് വിദ്യാഭ്യാസ ഡയറക്ടറുടെ പേരിലാകും ഭൂമി നല്കുക. കൈമാറുന്ന ഭൂമിയുടെ സ്കെച്ചും മഹസര് റിപ്പോര്ട്ടും അടക്കം റവന്യൂവകുപ്പ് തയ്യാറാക്കിക്കഴിഞ്ഞു എന്നാണ് ലഭിക്കുന്ന വിവരം.
എയിംസിന് അനുമതിനല്കണമെന്ന ആവശ്യത്തില് ധനമന്ത്രാലയം നടപടിയെടുത്തുവരികയാണെന്ന് കേന്ദ്ര ആരോഗ്യമന്ത്രാലയം നേരത്തെ തന്നെ വ്യക്തമാക്കിയിരുന്നു. കിനാലൂരില് എയിംസ് സ്ഥാപിക്കണമെന്ന ആവശ്യവുമായി കെ. മുരളീധരന് എം.പി. ഈയിടെ കേന്ദ്രസര്ക്കാരിനെ സമീപിച്ചിരുന്നു. ബജറ്റ് സമ്മേളനത്തിനിടെ ലോക്സഭയില് ഈ ആവശ്യമുന്നയിക്കുകയും ചെയ്തു.എയിംസ് അനുവദിച്ചാല് സ്ഥാപിക്കുക കിനാലൂരിലാണെന്നും വ്യവസായവകുപ്പിന്റെ കൈവശമിരിക്കുന്ന സ്ഥലം ആരോഗ്യവകുപ്പ് ലഭ്യമാക്കുമെന്നും മന്ത്രി വീണാജോര്ജ് കഴിഞ്ഞവര്ഷം വ്യക്തമാക്കിയിരുന്നു.
കിനാലൂര്, കാന്തലാട് വില്ലേജുകളിലെ ഭൂമി എയിംസ് ഒഴികെയുള്ള ഒരാവശ്യത്തിനും ഉപയോഗിക്കരുതെന്ന വ്യവസ്ഥയോടെയാകും കൈമാറ്റം. എയിംസ് ലഭിച്ചില്ലെങ്കില് ഭൂമിയുടെ ഉടമസ്ഥാവകാശം വ്യവസായ വകുപ്പ് നിലനിര്ത്തും. ആകെ 153.46 ഏക്കര് ഭൂമിയാകും വ്യവസായവകുപ്പ് കൈമാറുക. 80 ഏക്കര് സ്വകാര്യഭൂമികൂടി ഏറ്റെടുത്ത് നല്കാമെന്നാണ് കേരളത്തിന്റെ ശുപാര്ശ.കിനാലൂരിനൊപ്പം, തിരുവനന്തപുരത്തെ നെട്ടുകാല്ത്തേരി, കോട്ടയം മെഡിക്കല് കോളേജ്, കളമശ്ശേരി എച്ച്.എം.ടി. എന്നിവയും എയിംസ് സ്ഥാപിക്കാനുള്ള സ്ഥലങ്ങളുടെ പട്ടികയില് സംസ്ഥാനം ഉള്പ്പെടുത്തിയിരുന്നു.എന്നാല് കിനാലൂര് തെരഞ്ഞെടുക്കുകയായിരുന്നു.