കെ റെയില്‍ പദ്ധതിക്കെതിരെയുള്ള പ്രതിഷേധം അടങ്ങുന്നില്ല. തല്ലിയോടിച്ചും ഞങ്ങള്‍ കെ റെയില്‍ നടപ്പാക്കുമെന്നുള്ള വാശിയില്‍ സര്‍ക്കാരും പോലീസും. കണ്ണൂരില്‍ നടന്നത് കൂട്ടയടിയാണ്. കെ റെയില്‍ വിശദീകരണ യോഗത്തിലേക്ക് യൂത്ത് കോണ്‍ഗ്രസ് പ്രതിഷേധിച്ചെത്തിയതാണ് സംഘര്‍ഷത്തിലേക്ക് വഴിവെച്ചത്. മന്ത്രി എം.വി. ഗോവിന്ദന്‍ അടക്കമുള്ളവര്‍ പങ്കെടുക്കുന്ന യോഗത്തിലേക്കാണ് യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധവുമായെത്തിയത്.കണ്ണൂരിലെ ദിനേശ് ഓഡിറ്റോറിയത്തില്‍ വെച്ചാണ് കെ റെയില്‍ വിശദീകരണ യോഗം നടന്നത്. മന്ത്രി എം.വി. ഗോവിന്ദന്‍ യോഗം ഉദ്ഘാടനം ചെയ്ത് സംസാരിക്കുന്നതിനിടക്കായിരുന്നു യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധവുമായെത്തിയത്.
പ്രതിഷേധം വിളിച്ച് യോഗം നടക്കുന്ന ഓഡിറ്റോറിയത്തിനകത്തേക്ക് കടക്കാന്‍ പ്രവര്‍ത്തകര്‍ ശ്രമിച്ചെങ്കിലും യോഗത്തിന്റെ സംഘാടകരും മറ്റ് പ്രവര്‍ത്തകരും ചേര്‍ന്ന് ഉദ്ഘാടനയോഗം നടക്കുന്ന ഹാളിന്റെ വാതിലുകള്‍ അടക്കുകയായിരുന്നു.തുടര്‍ന്ന് ഓഡിറ്റോറിയത്തിന് പുറത്തെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ പുറത്തുനിന്ന് പ്രതിഷേധം തുടരുകയായിരുന്നു.ഇതേത്തുടര്‍ന്നാണ് പ്രതിഷേധക്കാരെ സ്ഥലത്ത് നിന്ന് നീക്കാന്‍ പൊലീസ് ഇടപെട്ടത്. പൊലീസും യൂത്ത് കോണ്‍ഗ്രസ് പ്രവര്‍ത്തകരും തമ്മില്‍ നടന്ന സംഘര്‍ഷത്തിനിടെ മാധ്യമപ്രവര്‍ത്തകരെ പൊലീസ് മര്‍ദ്ദിച്ചതായും റിപ്പോര്‍ട്ടുണ്ട്.
പ്രതിഷേധക്കാര്‍ ഓഡിറ്റോറിയത്തിന് പുറത്തെത്തിയപ്പോള്‍ അത് ചോദ്യം ചെയ്യാനെത്തിയ ജയ്ഹിന്ദ് ടി.വിയില്‍ നിന്നുള്ള മാധ്യമപ്രവര്‍ത്തകരടക്കമുള്ളവരെ പൊലീസ് മര്‍ദ്ദിച്ചു എന്നാണ് പരാതി.
ഇതേത്തുടര്‍ന്ന് പ്രതിഷേധം ശക്തമാവുകയും യൂത്ത് കോണ്‍ഗ്രസ് പ്രവര്‍ത്തകരും പൊലീസും തമ്മില്‍ വാക്കേറ്റമുണ്ടാവുകയുമായിരുന്നു. രംഗം വഷളായപ്പോള്‍ പ്രവര്‍ത്തകരെ പോലീസ് അറസ്റ്റ് ചെയ്ത് നീക്കുകയായിരുന്നു. പി. ജയരാജന്‍, എം.വി. ജയരാജന്‍, എ.എം. ഷംസീര്‍ എന്നിവരടക്കമുള്ള നേതാക്കളാണ് യോഗത്തില്‍ പങ്കെടുത്തത്.
യൂത്ത് കോണ്‍ഗ്രസ് നേതാവ് റിജില്‍ മാക്കുറ്റി അടക്കമുള്ള ആറു പേരെയാണ് റിമാന്‍ഡ് ചെയ്തത്. അതേസമയം, അടച്ചിട്ട ഹാളുകളില്‍ നടക്കുന്ന യോഗങ്ങള്‍ കയ്യേറിയുള്ള പ്രതിഷേധങ്ങള്‍ ജനാധിപത്യപരമല്ലെന്നും മന്ത്രി ഗോവിന്ദന്‍ മാസ്റ്റര്‍ ചൂണ്ടിക്കാട്ടി. എതിര്‍പ്പുകള്‍ക്ക് കീഴടങ്ങാതെ പദ്ധതിയുമായി മുന്നോട്ട് പോകുമെന്നും പദ്ധതിയില്‍ നിന്നൊരു വിട്ടുവീഴ്ചയുമില്ലെന്നും മന്ത്രി വ്യക്തമാക്കി.യൂത്ത് കോണ്‍ഗ്രസുകാര്‍ നടത്തിയത് ഗുണ്ടായിസമാണെന്ന് സിപിഐഎം ജില്ലാ സെക്രട്ടറി എം വി ജയരാജന്‍ പറഞ്ഞു. വന്നത് ഗുണ്ടകളാണ്. പരിപാടി നടത്താന്‍ അനുമതിയുണ്ടായിരുന്നു. കല്ല് പിഴുത് മാറ്റുമെന്ന് പറഞ്ഞ നേതാവിന്റെ ഗുണ്ടാ സംഘമാണ് സ്ഥലത്ത് എത്തിയതെന്നും എം വി ജയരാജന്‍ പറഞ്ഞു.
