അമ്മയ്ക്കെതിരെ ഡബ്ല്യുസിസി ഉന്നയിച്ച കാര്യങ്ങള് ചര്ച്ച ചെയ്യാന് എക്സിക്യൂട്ടിവ് കമ്മിറ്റി കൂടി താര സംഘടന. പുതിയ പ്രതിനിധികളെ തിരഞ്ഞെടുത്തതിന് ശേഷം ഇത്തരമൊരു പ്രശ്നം ചര്ച്ച ചെയ്യാനാണ് അമ്മ സംഘടനയുടെ യോഗം കൊച്ചിയില് ചേര്ന്നത്. ഡബ്ല്യുസിസി ആവശ്യപ്പെട്ട ഇന്റേണല് കമ്മിറ്റി അമ്മയിലുണ്ടെന്ന് പ്രസിഡന്റ് കൂടിയായ മോഹന്ലാല് വ്യക്തമാക്കി. ജസ്റ്റിസ് ഹേമ കമ്മീഷന് റിപ്പോര്ട്ടുമായി ബന്ധപ്പെട്ട് കഴിഞ്ഞ ദിവസം ഡബ്ല്യൂസിസി അംഗങ്ങള് സംഘടനയില് ഇന്റേണല് കമ്മിറ്റിയുടെ ആവശ്യകതയെ കുറിച്ച് സംസാരിക്കുകയും കമ്മിറ്റി വേണമെന്ന് സതി ദേവി ആവശ്യപ്പെടുകയും ചെയ്തിരുന്നു.
ഇതിന് മറുപടിയായാണ് മോഹന്ലാല് ഇന്റേണല് കമ്മിറ്റി ഉണ്ടെന്ന് അറിയിച്ചത്. ഇതിനൊപ്പം ഷമ്മി തിലകനുമായി ബന്ധപ്പെട്ട വിവാദവും കമ്മിറ്റിയില് ചര്ച്ച ചെയ്തു.വിവാദത്തെ തുടര്ന്ന് ഷമ്മി തിലകനെ പുറത്താകണമെന്നടക്കമുള്ള ആവശ്യങ്ങള് ഉന്നയിച്ചെങ്കിലും മമ്മൂട്ടിയടക്കമുള്ളവര് ഇടപെട്ടാണ് പ്രശ്നം പരിഹരിച്ചത്.ജനറല് ബോഡിയിലെ ദ്യശ്യങ്ങള് ക്യാമറയില് ചിത്രീകരിച്ചതില് ഷമ്മി തിലകനോട് വിശദീകരണം തേടാനും യോഗത്തില് തീരുമാനമായി.ഇതിനായി പ്രത്യേക കമ്മിറ്റിയെ തന്നെ രൂപീകരിച്ചതായി അമ്മ വൈസ് പ്രസിഡന്റ് മണിയന്പിള്ള രാജു മാധ്യമങ്ങളോട് വ്യക്തമാക്കി. കൂടാതെ എല്ലാ പ്രശ്നങ്ങളും മീറ്റിംഗില് ചര്ച്ച ചെയ്യുമെന്നും അതിനെല്ലാം പ്രത്യേകം കമ്മിറ്റികളെ രൂപികരിക്കുമെന്നും മണിയന്പിള്ള പറഞ്ഞു.
ജയസൂര്യ, വിജയ് ബാബു, ലാല്, ടിനി ടോം, ഉണ്ണി മുകുന്ദന്, സിദ്ദിഖ്, ഇടവേള ബാബു, ശ്വേത മേനോന്, ലെന, സുരഭി ലക്ഷ്മി, മഞ്ജു പിള്ള തുടങ്ങിയവര് യോഗത്തില് പങ്കെടുത്തിരുന്നു.
നടി ആക്രമിക്കപ്പെട്ട സംഭവത്തില് ഇരയ്ക്ക് പിന്തുണ നല്കി മുന്നോട്ടുവന്ന സൂപ്പര്സ്റ്റാറുകള്ക്കെതിരെ നടി പാര്വ്വതി തിരുവോത്ത് ഇന്നലെ രംഗത്തെത്തിയിരുന്നു. ഈ പിന്തുണച്ചവരുടെ പ്രൊഡക്ഷന് കമ്പനികള് നിയമം പാലിക്കുന്നുണ്ടോയെന്ന് ഉറപ്പുവരുത്തണമെന്നാണ് താരം ആവശ്യപ്പെട്ടത്. ഈ പറയുന്നവര് സാമൂഹമാധ്യമങ്ങളിലൂടെ പിന്തുണയറിയിച്ചാല് പോരെന്നും ആരുടെയൊക്കെ കമ്പനികളില് കംപ്ലെയിന്റ് സെല് ഉണ്ടെന്ന് മാധ്യമങ്ങള് ഉറപ്പുവരുത്തണമെന്നും പാര്വതി പറഞ്ഞിരുന്നു. അതിജീവിച്ച നടിയെ പിന്തുണച്ച് പലരും സോഷ്യല് മീഡിയയില് എത്തിയിട്ടുണ്ട്. അവരുടെയൊക്കെ പ്രൊഡക്ഷന് ഹൗസില് ഇന്റേണല് കംപ്ലെയ്ന്റ് കമ്മിറ്റി ഉണ്ടോ എന്നുള്ളത് മീഡിയയും വനിതാ കമ്മീഷനും കണ്ടുപിടിക്കണം. എല്ലാവരും പിന്തുണയ്ക്കുന്നു എന്ന ഹെഡ്ലൈന് മാത്രം വന്നിട്ടുപോയാല് പോരാ. നിയമപരമായിട്ട് കംപ്ലെയിന്റ് സെല് പ്രൊഡക്ഷന് കമ്പനികളിലുണ്ടോ എന്ന് പരിശോധിച്ചാല് ഒരു ശതമാനം പോലും ഇല്ല എന്നു കണ്ടുപിടിക്കാനാകുമെന്നും പാര്വതി വെല്ലുവിളിച്ചിരുന്നു.
സമാനമായ പ്രതികരണമായിരുന്നു നടി പത്മപ്രിയയും നടത്തിയത്.അമ്മ സംഘടന ആക്രമിക്കപ്പെട്ട ഇരയ്ക്കൊപ്പമാണെന്ന് പറയുന്നത് വെറുതെയാണെന്ന് സംഘടനയുടെ മെമ്പറുകൂടിയായ നടി പത്മപ്രിയ പറഞ്ഞിരുന്നു. നടിയെ ആക്രമിച്ച കേസിന്റെ പേരില് പുറത്തുപോയ നടിമാരെ ഉപാധികളില്ലാതെ തിരിച്ചെടുത്താലേ പറയുന്നതില് കാര്യമുള്ളൂ. പുറത്തുപോയവര് പുതിയ അംഗത്വ അപേക്ഷ നല്കണമെന്നാണ് അമ്മയുടെ നിലപാടെന്നും ഇത് പരിഹാസമാണെന്നും പതമപ്രിയ പറയുന്നു.
നടിയെ ആക്രമിച്ച കേസില് എട്ട് സാക്ഷികളെ വിസ്തരിക്കാന് പ്രോസിക്യൂഷന് അനുമതി നല്കി ഹൈക്കോടതി. 12 സാക്ഷികളെ വിസ്തരിക്കണമെന്നായിരുന്നു പ്രോസിക്യൂഷന് ഹര്ജി. ഇതില് എട്ട് പേരെ വിസ്തരിക്കാമെന്ന് ഹൈക്കോടതി വ്യക്തമാക്കി. അഞ്ച് പുതിയ സാക്ഷികളെയും നേരത്തെ വിസ്തരിച്ച മൂന്ന് സാക്ഷികളെയും വിസ്തരിക്കാനാണ് അനുമതി. കേസിലെ പ്രധാനപ്പെട്ട ഫോണ് രേഖകള് വിചാരണ കോടതി പരിശോധിക്കണമെന്ന ഹര്ജിയും ഹൈക്കോടതി അംഗീകരിച്ചു.
മുന് പ്രോസിക്യൂട്ടര് രാജി വെച്ച സാഹചര്യത്തില് സ്പെഷ്യല് പ്രോസിക്യൂട്ടറെ പത്ത് ദിവസത്തിനുള്ളില് നിയമിക്കണമെന്നും ഹൈക്കോടതി നിര്ദ്ദേശിച്ചു. നേരത്തെ ഹര്ജി പരിഗണിച്ചപ്പോള് ഹൈക്കോടതിയുടെ ഭാഗത്ത് നിന്നും പ്രോസിക്യൂഷന് നേരെ ചോദ്യങ്ങളുയര്ന്നിരുന്നു. എന്നാലിപ്പോള് പ്രോസിക്യൂഷന് അനുകൂലമായ വിധിയാണ് കോടതിയില് നിന്നും ഉണ്ടായിരിക്കുന്നത്.കേസിലെ സാക്ഷികളെ വീണ്ടും വിസ്തരിക്കാന് മതിയായ കാരണം വേണമെന്ന് ഹൈക്കോടതി വ്യക്തമാക്കിയിരുന്നു.