ഇടപ്പള്ളി വൈറ്റില ബൈപാസില് ഗതാഗത തടസ്സം ഉണ്ടാക്കിയതിന് പ്രതികരിച്ച നടന് ജോജു ജോര്ജ്ജിനെതിരെ രംഗത്തെത്തുന്ന കോണ്ഗ്രസ് നേതാക്കളെ പരിഹസിച്ച് രാഷ്ട്രീയ നിരീക്ഷകന് ശ്രീജിത്ത് പണിക്കര്. അഹങ്കാരിയായ ജോജുജോജുവിനെ ഇനിയും വഴിതടയണം എന്നു തുടങ്ങി കോണ്ഗ്രസിനോട് ചില നിര്ദേശങ്ങള് പങ്കുവയ്ക്കുകയാണ് ശ്രീജിത്ത്. അഹങ്കാരിയായ ജോജു ജോര്ജിനെതിരെ താഴെപ്പറയുന്ന നടപടികള് സ്വീകരിക്കണമെന്നാണ് ശ്രീജിത്ത് പറയുന്നത്.
ഇന്ധനവില കുറയ്ക്കാന് പാടില്ലെന്ന് കേന്ദ്രത്തോടും സംസ്ഥാനത്തോടും തുടര്ച്ചയായി നിര്ദ്ദേശിക്കുന്ന ജോജുവിനെ ഇനിയും വഴിതടയണം, ഇനിമേലില് ജോജുവിന്റെ സിനിമകള് താന് കാണില്ലെന്ന് രാഹുല് ഗാന്ധിജി പ്രഖ്യാപിക്കണം. ഗാന്ധിജിക്ക് സമയമില്ലെങ്കില് വേണുഗോപാല്ജി പ്രഖ്യാപിച്ചാലും മതിയാകുമെന്നും ശ്രീജിത്ത് പരിഹസിക്കുന്നു. ജോജുവിന്റെ വാഹനത്തിന്റെ ചില്ല് സമാധാനപരമായി ഇളക്കിമാറ്റിയവര്ക്ക് എതിരായ കേസ് പിന്വലിക്കണം. അവര്ക്ക് വാഹന സര്വീസ് സെന്ററില് ജോലി നല്കണമെന്നും ശ്രീജിത്ത് പരിഹസിക്കുന്നു. ജോജു മദ്യപിക്കാറില്ലെങ്കില് ആളിന് ദിവസേന വീട്ടില് കുപ്പി എത്തിച്ചു കൊടുക്കാന് ശ്രദ്ധിക്കണം. മുന്പ് പി ടി ഉഷയ്ക്ക് കാവിനിക്കര് അയച്ചുകൊടുത്ത യൂത്തന് ടീമിനെ ഇതിന്റെ ചുമതല ഏല്പിക്കണമെന്നും ശ്രീജിത്ത് പറയുന്നു.
മലയാളികളില് നിന്നും മേലനങ്ങാതെ കൊള്ളയടിച്ച് പണമുണ്ടാക്കിയ ജോജുവിന്റെ സ്വത്ത് കണ്ടുകെട്ടണം.റോഡുകളുടെ ആധാരം മാഡംജിയുടെ പേരില് ആയിരിക്കുന്നിടത്തോളം കാലം അത്തരം റോഡുകളില് ജോജുവിന്റെ സഞ്ചാര സ്വാതന്ത്ര്യം നിരോധിക്കണം.ഹും, അത്രയ്ക്കായോ ജോജൂ എന്നും ശ്രീജിത്ത് പണിക്കര് പരിഹസിക്കുന്നു. ഇന്ധനവില വര്ദ്ധനവിനെതിരെ പ്രതിഷേധിക്കാന് ഈ ജനാധിപത്യ സമൂഹത്തില് അവകാശമുണ്ട്. എന്നാല് അത് സാധാരണക്കാരെ വഴിമുട്ടിച്ച് കൊണ്ടാകരുത്. നിങ്ങള് പ്രതിഷേധിക്കേണ്ടത് കേരളസാര്ക്കാരിനെതിരെയും കേന്ദ്രസര്ക്കാരിനെതിരെയുമാണ്. ആ മന്ത്രിമാര് പോകുന്നിടത്താണ് നിങ്ങള് പ്രതിഷേധിക്കണ്ടതെന്നും ശ്രീജിത്ത് പണിക്കര് ചാനല് ചര്ച്ചയ്ക്കിടെ പറയുന്നു.