ഡോളര്‍ കടത്ത് കേസില്‍ ഇന്നും നിയമസഭയില്‍ പ്രതിഷേധിച്ച് പ്രതിപക്ഷം. മുഖ്യമന്ത്രി മൗനം വെടിയണമെന്നാവശ്യപ്പെട്ട് നിയമസഭാ കവാടത്തിന് മുന്നില്‍ അഴിമതി വിരുദ്ധ മതില്‍ തീര്‍ത്ത് പ്രതിപക്ഷം. മുഖ്യമന്ത്രിക്ക് എതിരായ ആരോപണം ചര്‍ച്ച ചെയ്യാത്തതില്‍ പ്രതിഷേധിച്ച് സഭ ബഹിഷ്‌കരിച്ചതിന് പിന്നാലെയാണ് പ്രതിപക്ഷം അഴിമതി വിരുദ്ധ മതില്‍ തീര്‍ത്ത് പ്രതിഷേധിച്ചത്. മുഖ്യമന്ത്രി റേഡിയോ പോലെ കേള്‍ക്കുകയാണ്, മറുപടി പറയുന്നില്ല. നിയമസഭയില്‍ ഇത്രയും വലിയ വിഷയത്തില്‍ മറുപടി പറയണമെങ്കില്‍ കൃത്യമായിട്ടുള്ള മറുപടിയായിരിക്കണമെന്ന് മുഖ്യമന്ത്രിക്കറിയാം. വ്യക്തമായ ഉത്തരം പറയാതെ അദ്ദേഹത്തിന് രക്ഷപ്പെടാന്‍ കഴിയില്ല. അതുകൊണ്ടാണ് പിണറായി വിജയന്‍ മൗനം പാലിക്കുന്നതെന്ന് വിഡി സതീശന്‍ പറയുന്നു. പിണറായിക്ക് ഉത്തരം പറയാന്‍ ധൈര്യമില്ല, ഭയമാണെന്നും വിഡി സതീശന്‍ ആഞ്ഞടിച്ചു.
മുഖ്യമന്ത്രിയുടെ മൗനം ജനങ്ങളുടെ ആശങ്ക വര്‍ധിപ്പിച്ചു.ഡോളര്‍ക്കടത്തില്‍ മുഖ്യമന്ത്രി രാജിവെക്കണമെന്നാവശ്യപ്പെട്ട് ചോദ്യോത്തരവേള തുടങ്ങിയത് മുതല്‍ മുദ്രാവാക്യം വിളിച്ചും ബാനര്‍ ഉയര്‍ത്തിയും പ്രതിപക്ഷം പ്രതിഷേധിച്ചിരുന്നു. സഭയില്‍ ബാനര്‍ ഉയര്‍ത്തുന്നത് ചട്ടവിരുദ്ധമാണെന്നെന്നും ചോദ്യോത്തരവേള തടസ്സപ്പെടുത്തരുതെന്ന് സ്പീക്കര്‍ പറഞ്ഞിരുന്നു. ഏറെ നേരം പ്രതിഷേധിച്ച ശേഷം പ്രതിപക്ഷം സഭ ബഹിഷ്‌കരിക്കുകയായിരുന്നു.
പ്രതിപക്ഷ നേതാവിന് ഡല്‍ഹിയില്‍ പോകാനുള്ളത് കൊണ്ടാണ് സഭ ബഹിഷ്‌കരിക്കുന്നതെന്ന് ധനമന്ത്രി കെ.എന്‍.ബാലഗോപാല്‍ പരിഹസിച്ചു. ഡോളര്‍ കേസ് സഭയെ ഇന്നും പ്രക്ഷുബ്ധമാക്കുകയായിരുന്നു.
You must be logged in to post a comment Login