ആരോഗ്യമന്ത്രി പൂര്‍ണ പരാജയമാണെന്ന് പറഞ്ഞ പിസി ജോര്‍ജ്ജ് ദയനീയമാണ് വീണയുടെ കാര്യമെന്നും ആക്ഷേപിച്ചു. ആരോഗ്യമന്ത്രിക്ക് പലകാര്യങ്ങളെ കുറിച്ചും അറിവില്ല. വീണ ജോര്‍ജ്ജിനെ അവിടെ പിടിച്ചിരുത്തിയതോടെ മുടിഞ്ഞുവെന്നും അവരുടെ മണ്ഡലത്തിലാ ഏറ്റവും കൂടുതല്‍ കൊവിഡെന്നും പിസി ജോര്‍ജ്ജ് പരിഹസിക്കുന്നു. മന്ത്രിയുടെ സ്വന്തം ജില്ലയായ പത്തനംതിട്ടയില്‍ പോലും അവര്‍ക്ക് കോവിഡ് നിയന്ത്രിക്കാന്‍ സാധിക്കുന്നില്ല. കോവിഡ് വാക്സിന്‍ കളിപ്പീരാണെന്നും ഗുണകരം ഹോമിയോ ആണെന്നും പി.സി ജോര്‍ജ് പറയുന്നു. രണ്ട് ഡോസ് വാക്സിന്‍ എടുത്തവര്‍ക്കും കോവിഡ് വന്നത് ചൂണ്ടികാട്ടിയാണ് പി.സി ജോര്‍ജ് ഇക്കാര്യം പറഞ്ഞത്. ഹോമിയോ മരുന്ന് കഴിച്ചത് കൊണ്ടാകാം തനിക്ക് കോവിഡ് വരാത്തതെന്നും പി.സി ജോര്‍ജ് പറഞ്ഞു.
നല്ല ഒന്നാന്തരം കഴിവുള്ള സ്ത്രീയാണ് ആരോഗ്യകാര്യം കൈകാര്യം ചെയ്തിരുന്നത്. 60,000 ഭൂരിപക്ഷം ലഭിച്ചപ്പോള്‍ അവരോട് കുശുമ്പു കയറി അവരെ ചാടിച്ചുവിട്ട പിണറായിക്ക് ഇപ്പോള്‍ എന്തൊരു കഷ്ടകാലമാണ് വന്നിരിക്കുന്നത്. അതേസമയം, സ്വര്‍ണക്കടത്ത് കേസിലെ മൊഴികള്‍ പുറത്ത് വന്ന സാഹചര്യത്തില്‍ മുഖ്യമന്ത്രി രാജിവെക്കണമെന്ന് പി.സി ജോര്‍ജ് ആവശ്യപ്പെട്ടു. കേന്ദ്രത്തിന്റെ നിലപാടില്‍ സംശയമുണ്ട്. ഒത്തുതീര്‍പ്പ് നടക്കുന്നുണ്ടോ എന്ന് സംശയിക്കണം. മുഖ്യമന്ത്രിക്കെതിരായ നടപടി മാറ്റിവെക്കുന്നതില്‍ ഇ.ഡി ഉത്തരം പറയണമെന്നും അദ്ദേഹം പറഞ്ഞു.
You must be logged in to post a comment Login